فرانسیسی صدر ایمانوئل میکرون نے آبنائے ہرمز کو طاقت کے زور پر کھولنے کے لیے کسی بھی فوجی آپریشن کو غیر حقیقت پسندانہ قرار دیا ہے۔ یہ بیان امریکی صدر ڈونلڈ ٹرمپ کی جانب سے اتحادیوں پر آبنائے کو دوبارہ کھولنے کے لیے کام کرنے پر زور دینے کے بعد سامنے آیا ہے۔
جنوبی کوریا کے دورے کے دوران صحافیوں سے گفتگو کرتے ہوئے فرانسیسی صدر نے کہا کہ کچھ حلقے آبنائے ہرمز کو فوجی آپریشن کے ذریعے آزاد کرانے کے نظریے کی حمایت کرتے ہیں، جس کا اظہار بعض اوقات امریکہ کی جانب سے بھی کیا گیا ہے، اگرچہ اس موقف میں تبدیلی آتی رہی ہے۔
ایمانوئل میکرون نے واضح کیا کہ یہ وہ آپشن نہیں ہے جس کی ہم نے کبھی حمایت کی ہو کیونکہ یہ غیر حقیقت پسندانہ ہے۔ انہوں نے مزید کہا کہ اس عمل میں بہت زیادہ وقت لگے گا اور یہ آبنائے سے گزرنے والے تمام جہازوں کو پاسدارانِ انقلاب کے ساتھ ساتھ بیلسٹک میزائلوں کے خطرات سے بھی دوچار کر دے گا۔
