برطانیہ نے خلیجی خطے میں اپنے اور کویتی مفادات کے تحفظ کے لیے ریپڈ سینٹری ایئر ڈیفنس سسٹم کویت منتقل کرنے کا فیصلہ کیا ہے۔ یہ پیش رفت کویت کی ایک آئل ریفائنری پر ایرانی ڈرون حملے کے بعد سامنے آئی ہے۔
برطانوی وزیراعظم کیئر اسٹارمر کے دفتر کے مطابق، وزیراعظم نے جمعہ کی صبح کویت کے ولی عہد شہزادہ صباح الخالد الصباح سے ٹیلی فون پر گفتگو کی۔ اس دوران وزیراعظم نے کویتی آئل ریفائنری پر ہونے والے غیر ذمہ دارانہ ڈرون حملے کی شدید الفاظ میں مذمت کی۔
ڈاؤننگ اسٹریٹ کے ترجمان کا کہنا ہے کہ کیئر اسٹارمر نے اس عزم کا اعادہ کیا ہے کہ برطانیہ کویت اور خلیج میں اپنے تمام اتحادیوں کے ساتھ کھڑا ہے۔
برطانوی فضائی دفاعی نظام بنیادی طور پر ڈرونز اور کم بلندی پر پرواز کرنے والے فضائی اہداف کو تباہ کرنے کی صلاحیت رکھتا ہے۔ حکام کا کہنا ہے کہ اس نظام کی تعیناتی کا مقصد خطے میں برطانوی اور کویتی اہلکاروں کے تحفظ کو یقینی بنانا ہے، جبکہ اس اقدام سے تناؤ کو وسیع تر جنگ میں تبدیل ہونے سے روکنے کی کوشش بھی کی جائے گی۔
اس ٹیلی فونک رابطے کے دوران دونوں رہنماؤں نے آبنائے ہرمز کے راستے عالمی جہاز رانی میں حائل رکاوٹوں پر بھی تبادلہ خیال کیا۔ انہوں نے اس اہم بحری راستے کو دوبارہ کھولنے کے لیے حکمت عملی وضع کرنے پر اتفاق کیا، جس کے لیے برطانوی وزیر خارجہ ایویٹ کوپر کی صدارت میں جمعرات کو ایک اجلاس منعقد کیا گیا تھا۔
