ایران کے جنوب مغربی علاقے میں واقع بوشہر جوہری بجلی گھر کی بیرونی حدود کے قریب ایک پروجیکٹائل گرنے سے ایک شخص ہلاک ہو گیا ہے۔ خبر رساں ادارے تسنیم کے مطابق ہفتے کے روز پیش آنے والے اس واقعے میں جوہری پلانٹ کے مرکزی حصے کو کوئی نقصان نہیں پہنچا۔
ایران کی اٹامک انرجی آرگنائزیشن نے تصدیق کی ہے کہ ہلاک ہونے والا شخص پلانٹ کی سیکیورٹی ٹیم کا رکن تھا۔ حکام کے مطابق حملے کے نتیجے میں تنصیب کی ایک ذیلی عمارت کو جزوی نقصان پہنچا ہے۔
الجزیرہ کی رپورٹ کے مطابق ایرانی خبر رساں ادارے نے واضح کیا ہے کہ اس حملے کے بعد کسی قسم کے تابکاری خطرات موجود نہیں ہیں۔ صورتحال پر قابو پا لیا گیا ہے اور جوہری پلانٹ کے اہم تنصیبات مکمل طور پر محفوظ ہیں۔
