امریکہ اور اسرائیل کی جانب سے ایران کے مختلف مقامات پر کیے گئے حملوں کے نتیجے میں متعدد ہلاکتیں اور درجنوں افراد کے زخمی ہونے کی اطلاعات ہیں۔ ایرانی میڈیا کے مطابق ہفتے کے روز ہونے والے ان حملوں کا مرکزی ہدف صوبہ خوزستان میں واقع پیٹرو کیمیکل کے چھ بڑے پلانٹس تھے۔
مقامی حکام کے مطابق ماہ شہر، تہران اور بوشہر میں بھی تنصیبات کو نشانہ بنایا گیا۔ ان حملوں میں کم از کم پانچ افراد ہلاک اور ایک سو ستر زخمی ہوئے ہیں۔ خوزستان کے ڈپٹی گورنر نے تصدیق کی ہے کہ ماہ شہر کے اسپیشل پیٹرو کیمیکل زون میں زوردار دھماکے سنے گئے جہاں کم از کم تین کمپنیوں کو نشانہ بنایا گیا۔
تسنیم نیوز ایجنسی کے مطابق حملوں سے ہونے والے نقصانات کا تخمینہ لگایا جا رہا ہے تاہم پیٹرو کیمیکل پلانٹس پر براہ راست حملوں کے باعث بڑے پیمانے پر تباہی ہوئی ہے۔ متاثرہ مقامات پر امدادی ٹیمیں پہنچ چکی ہیں اور زخمیوں کو قریبی ہسپتالوں میں منتقل کیا جا رہا ہے۔
اے ایف پی کی رپورٹ کے مطابق دھماکے مقامی وقت کے مطابق صبح ساڑھے سات بجے ہوئے اور اس دوران فضا میں ڈرون جیسی آوازیں سنی گئیں۔ بوشہر میں جوہری پاور پلانٹ کے قریب ایک شہری کی ہلاکت کی بھی اطلاع ہے جس کے بعد علاقے میں خوف و ہراس پھیل گیا ہے۔
دارالحکومت تہران میں شہید بہشتی یونیورسٹی اور ایک قریبی تحقیقی مرکز کو بھی نشانہ بنایا گیا جس سے تعلیمی اور سائنسی تنصیبات کو نقصان پہنچا۔ اس کے علاوہ پاسدارانِ انقلاب کے ایک ایئر ڈیفنس سینٹر پر بھی حملے کی اطلاعات ہیں تاہم وہاں ہونے والے نقصانات کی تصدیق تاحال نہیں ہو سکی ہے۔ ایرانی حکام نے تاحال کوئی باضابطہ بیان جاری نہیں کیا ہے اور حملوں کی تحقیقات جاری ہیں۔
