ہسپانوی وزیراعظم پیڈرو سانچیز نے امریکہ اور ایران کے درمیان دو ہفتوں کی جنگ بندی کے اعلان کا خیرمقدم کیا ہے تاہم انہوں نے واشنگٹن انتظامیہ کو بالواسطہ تنقید کا نشانہ بناتے ہوئے کشیدگی کے آغاز کا ذمہ دار قرار دیا ہے۔
سماجی رابطے کی ویب سائٹ ایکس پر اپنے ایک بیان میں پیڈرو سانچیز نے کہا کہ ہسپانوی حکومت ان لوگوں کی تعریف نہیں کرے گی جو دنیا کو آگ لگانے کے بعد اسے بجھانے کے لیے پانی کی بالٹی لے کر پہنچ جاتے ہیں۔
وزیراعظم کا کہنا تھا کہ جنگ بندی کی خبریں ہمیشہ خوش آئند ہوتی ہیں مگر عارضی سکون ہمیں تباہی، انتشار اور ضائع ہونے والی انسانی جانوں کو فراموش کرنے پر مجبور نہیں کر سکتا۔ انہوں نے عالمی برادری پر زور دیا کہ بین الاقوامی قوانین کے احترام اور سفارتکاری کو فروغ دے کر پائیدار امن قائم کیا جائے۔
پیڈرو سانچیز ان مغربی رہنماؤں میں شامل ہیں جنہوں نے اس جنگ کو غیر قانونی اور غیر ذمہ دارانہ قرار دیتے ہوئے سخت مؤقف اپنایا ہے۔ ہسپانوی حکومت نے ان امریکی طیاروں کے لیے اپنی فضائی حدود بند کر دی ہیں جو کارروائیوں میں ملوث رہے ہیں، جبکہ جنوبی اسپین میں موجود مشترکہ فوجی اڈوں کے استعمال پر بھی پابندی عائد کر دی گئی ہے۔
