ایران نے لبنان پر اسرائیل کے جاری فضائی حملوں پر سخت انتباہ جاری کرتے ہوئے کہا ہے کہ اگر یہ کارروائیاں بند نہ ہوئیں تو تہران حال ہی میں طے پانے والے جنگ بندی معاہدے سے دستبردار ہو سکتا ہے۔ اقوام متحدہ میں ایران کے مندوب امیر سعید ایروانی نے خبردار کیا ہے کہ اسرائیلی بمباری کا تسلسل تہران کو معاہدے پر نظرثانی کرنے پر مجبور کر دے گا۔ انہوں نے واضح کیا کہ اگر اسرائیل نے حملے نہ روکے تو اسے آئندہ چند روز میں سنگین نتائج کا سامنا کرنا پڑ سکتا ہے۔
امریکی صدر ڈونلڈ ٹرمپ نے پی بی ایس نیوز کو انٹرویو دیتے ہوئے کہا ہے کہ لبنان ان کے اور ایران کے درمیان طے پانے والے جنگ بندی معاہدے کا حصہ نہیں ہے۔ ایک سوال کے جواب میں ٹرمپ نے لبنان میں اسرائیلی حملوں کو ایک الگ تنازع قرار دیا اور کہا کہ اس معاملے کو دیکھ لیا جائے گا۔ وائٹ ہاؤس کی پریس سیکریٹری کیرولین لیوٹ نے بھی اس بات کی تصدیق کی ہے کہ لبنان مذکورہ معاہدے کا حصہ نہیں ہے۔
اسرائیل نے بیروت سمیت لبنان کے مختلف علاقوں میں شدید فضائی حملے کیے ہیں جن کے نتیجے میں درجنوں افراد ہلاک اور زخمی ہوئے ہیں۔ ان حملوں کے بعد خطے میں کشیدگی میں مزید اضافہ ہو گیا ہے اور سفارتی سطح پر تشویش کا اظہار کیا جا رہا ہے۔
