لبنان نے اسرائیلی جارحیت کے فوری خاتمے کے لیے پاکستان سے تعاون کی درخواست کر دی ہے۔ وزیراعظم شہباز شریف اور لبنانی ہم منصب نواف سلام کے درمیان ٹیلی فونک رابطہ ہوا جس میں خطے کی کشیدہ صورتحال پر تبادلہ خیال کیا گیا۔
وزیراعظم ہاؤس کی جانب سے جاری بیان کے مطابق وزیراعظم شہباز شریف نے لبنان پر جاری اسرائیلی حملوں کی شدید الفاظ میں مذمت کی اور قیمتی انسانی جانوں کے ضیاع پر گہرے دکھ اور افسوس کا اظہار کیا۔
لبنانی وزیراعظم نے پاکستان کی جانب سے امن کے لیے کی جانے والی کاوشوں کو سراہا اور مطالبہ کیا کہ اسلام آباد لبنان اور وہاں کے عوام پر ہونے والے حملوں کو رکوانے کے لیے اپنا سفارتی کردار ادا کرے۔
وزیراعظم شہباز شریف نے لبنانی ہم منصب کو یقین دلایا کہ پاکستان خطے میں قیام امن کے لیے مخلصانہ کوششیں جاری رکھے گا۔ انہوں نے کہا کہ ایران اور امریکہ کے مابین مذاکرات کا انعقاد اسی عزم کا حصہ ہے جس کا مقصد خطے کو جنگ سے محفوظ رکھنا ہے۔
اس سے قبل فرانسیسی صدر ایمانوئل میکرون نے بھی وزیراعظم شہباز شریف سے ٹیلی فون پر گفتگو کی اور ایران و امریکہ کے درمیان دو ہفتہ وار جنگ بندی کروانے پر پاکستان کے کردار کی تعریف کی۔ فرانسیسی صدر نے مذاکرات کی میز پر دونوں فریقین کو لانے میں پاکستان کی سفارتی کامیابی کو سراہا اور اسلام آباد میں ہونے والے آئندہ مذاکرات کی کامیابی کے لیے نیک خواہشات کا اظہار کیا۔
وزیراعظم شہباز شریف نے فرانسیسی صدر کا شکریہ ادا کرتے ہوئے اعادہ کیا کہ پاکستان خطے میں استحکام کے لیے اپنی ذمہ داریاں نبھاتا رہے گا۔ دونوں رہنماؤں نے لبنان میں جاری تشدد پر شدید تشویش کا اظہار کرتے ہوئے فوری جنگ بندی اور امن کی بحالی پر زور دیا۔
