اسرائیل نے جمعہ کے روز اعلان کیا ہے کہ اس نے غزہ میں جنگ بندی کے بعد پیدا ہونے والی صورتحال کو مستحکم کرنے کے لیے قائم کردہ امریکی مرکز میں اسپین کی شرکت پر پابندی عائد کر دی ہے۔
کیریاٹ گیٹ میں قائم سول ملٹری کوآرڈینیشن سینٹر دس اکتوبر دو ہزار پچیس کو جنگ بندی کے نفاذ کے بعد بنایا گیا تھا۔ اس مرکز کا بنیادی مقصد جنگ بندی کی نگرانی کرنا اور فلسطینی علاقے میں انسانی امداد کی فراہمی کو یقینی بنانا ہے۔
اس مرکز میں فرانس، برطانیہ اور متحدہ عرب امارات سمیت کئی ممالک کے فوجی اہلکار اور سفارت کار موجود ہیں جو دو سال سے زائد عرصے کی تباہ کن جنگ کے بعد غزہ میں سیکیورٹی اور انسانی امور پر ہونے والے اجلاسوں میں حصہ لیتے ہیں۔
اب تک ہسپانوی نمائندے بھی اس مرکز کے کاموں میں شریک رہے تھے تاہم جمعہ کو اسرائیلی وزارت خارجہ نے باضابطہ طور پر اعلان کیا کہ اب اسپین کو مرکز کے اجلاسوں میں شرکت کی اجازت نہیں ہوگی۔
اسرائیلی وزیر خارجہ گیڈون سار نے اپنے ایک بیان میں واضح کیا ہے کہ اسپین کو کیریاٹ گیٹ میں قائم سول ملٹری کوآرڈینیشن سینٹر میں شرکت کی ہرگز اجازت نہیں دی جائے گی۔
