برطانیہ کے محکمہ داخلہ نے سوشل میڈیا پر جاری کردہ ایک بیان میں تصدیق کی ہے کہ سرحدی محافظوں نے ایک ماہ سے بھی کم عرصے میں لندن گیٹ وے بندرگاہ سے پانچ ٹن کوکین قبضے میں لے لی ہے۔ حکام کے مطابق ضبط کی گئی منشیات کی مالیت 400 ملین پاؤنڈ یعنی تقریباً 538 ملین امریکی ڈالر سے زائد ہے۔
لندن سے تقریباً 30 میل دور واقع یہ بندرگاہ انگلینڈ کی دوسری بڑی بندرگاہ ہے جہاں بڑے کنٹینر بردار جہاز لنگر انداز ہوتے ہیں۔ محکمہ داخلہ نے انکشاف کیا ہے کہ مجرمانہ گروہوں نے منشیات کو چھپانے کے لیے مختلف اشیاء کا سہارا لیا جن میں کیلوں کی کھیپ اور جنوبی امریکی شراب کے بڑے ڈرم شامل تھے۔ جاری کردہ تصاویر میں منشیات کو کارگو کنٹینرز اور عمارت کے فرش پر پھیلا ہوا دیکھا جا سکتا ہے۔ تاہم حکام نے اس کارروائی کے دوران کسی گرفتاری کے حوالے سے کوئی تفصیلات فراہم نہیں کیں۔
برطانیہ کی بندرگاہوں پر منشیات کی یہ بڑی پکڑ کوئی پہلا واقعہ نہیں ہے۔ رواں برس مارچ میں ساؤتھمپٹن ڈاکس کے ذریعے 100 ملین ڈالر مالیت کی کوکین اسمگل کرنے کی کوشش ناکام بنائی گئی تھی جس کے بعد تین ملزمان کو گرفتار کیا گیا تھا۔ ان افراد کی اگلی پیشی 17 اپریل کو متوقع ہے۔ اس سے قبل فروری 2024 میں ساؤتھمپٹن میں ہی کیلوں کی ایک کھیپ سے 12 ہزار 500 پاؤنڈ سے زائد کوکین برآمد ہوئی تھی جو اس وقت تک ملک کی تاریخ کی سب سے بڑی انفرادی کھیپ تھی۔
عالمی سطح پر بھی مجرمانہ نیٹ ورکس کی جانب سے کیلوں کی ترسیل کو منشیات کی اسمگلنگ کے لیے استعمال کرنے کا رجحان بڑھ رہا ہے۔ اگست 2025 میں یونانی پولیس نے 600 پاؤنڈ، جولائی میں روس نے 1800 پاؤنڈ جبکہ مئی میں ناروے کے حکام نے ایک فروٹ ڈسٹری بیوٹر کے ہاں سے 320 پاؤنڈ سے زائد کوکین برآمد کی تھی جسے کیلوں کی کھیپ میں چھپایا گیا تھا۔
