اسلام آباد میں ہونے والے امریکہ اور ایران کے درمیان مذاکرات کسی حتمی نتیجے تک پہنچے بغیر ختم ہو گئے ہیں جس کے بعد دونوں ممالک کی جانب سے متضاد بیانات سامنے آئے ہیں۔
ایرانی وفد کے قریبی ذرائع کا حوالہ دیتے ہوئے فارس نیوز ایجنسی نے دعویٰ کیا ہے کہ امریکہ مذاکرات کی میز سے اٹھنے کے لیے محض بہانے تلاش کر رہا تھا۔ ذرائع کا کہنا ہے کہ امریکہ کو بین الاقوامی سطح پر اپنی ساکھ بچانے کے لیے ان مذاکرات کی ضرورت تھی، تاہم ایران کے ساتھ جاری تنازع میں شکست اور تعطل کے باوجود واشنگٹن اپنے مطالبات میں لچک دکھانے کے لیے تیار نہیں تھا۔
مذاکرات کے حوالے سے سامنے آنے والی اطلاعات کے مطابق امریکہ ان بات چیت کو کسی پیش رفت کے بغیر ختم کرنے کا ارادہ رکھتا تھا۔ دوسری جانب تسنیم نیوز ایجنسی نے اپنے ذرائع کے حوالے سے کہا ہے کہ اب گیند امریکہ کی کورٹ میں ہے۔ ایران نے مذاکرات کے دوران اپنی تجاویز پیش کر دی ہیں اور تہران پر بات چیت دوبارہ شروع کرنے کے لیے کوئی فوری دباؤ نہیں ہے۔
ایرانی حکام کا کہنا ہے کہ تہران مستقبل میں صورتحال کا جائزہ لے گا، تاہم آئندہ کے مذاکرات کے لیے نہ تو کسی تاریخ کا تعین کیا گیا ہے اور نہ ہی کسی مقام کا فیصلہ ہوا ہے۔
پریس ٹی وی کے مطابق دونوں ممالک کے درمیان آبنائے ہرمز، جوہری امور اور دیگر وسیع تر مطالبات پر شدید اختلافات پائے گئے، جس کی وجہ سے کسی فریم ورک معاہدے تک پہنچنا ممکن نہ ہو سکا۔
پاکستان کی ثالثی میں ہونے والی جنگ بندی کے بعد اسلام آباد میں منعقدہ یہ مذاکرات کئی دہائیوں بعد امریکہ اور ایران کے درمیان پہلا براہ راست اعلیٰ سطحی رابطہ تھے۔ ان مذاکرات کا مقصد دونوں ممالک کے درمیان جاری کشیدگی کو کم کرنا تھا، تاہم دیرینہ اختلافات اب بھی کسی بڑی پیش رفت کی راہ میں بڑی رکاوٹ بنے ہوئے ہیں۔
