اقوام متحدہ نے پاکستان اور افغان حکومت کی جانب سے عید الفطر کے موقع پر فوجی کارروائیوں میں عارضی وقفے کے فیصلے کا خیرمقدم کیا ہے۔ نیویارک میں اقوام متحدہ کے ہیڈ کوارٹرز میں بریفنگ کے دوران سیکریٹری جنرل کے نائب ترجمان فرحان عزیز حق نے اس پیش رفت کو خوش آئند قرار دیا۔
ترجمان کا کہنا تھا کہ سیکریٹری جنرل پہلے ہی کشیدگی میں کمی اور فوری جنگ بندی کا مطالبہ کر چکے ہیں، لہذا یہ اقدام بین الاقوامی قوانین کے عین مطابق ہے۔ اقوام متحدہ نے امید ظاہر کی ہے کہ عید کے دوران شروع ہونے والا یہ وقفہ مزید طویل کیا جائے گا۔
پاکستان کے وزیر اطلاعات عطا اللہ تارڑ کے مطابق فوجی کارروائیوں میں یہ عارضی وقفہ بدھ کی شب بارہ بجے سے شروع ہو چکا ہے جو 23 مارچ تک جاری رہے گا۔
اس فیصلے کے پس منظر میں ترکیہ، سعودی عرب اور قطر کی جانب سے کی گئی درخواستیں شامل ہیں، جن کے بعد فریقین نے عید کے ایام میں عسکری سرگرمیاں معطل کرنے پر اتفاق کیا۔ اقوام متحدہ نے اس اقدام کو خطے میں کشیدگی کم کرنے کی جانب ایک مثبت قدم قرار دیا ہے۔
