سکھر میں میڈیا سے گفتگو کرتے ہوئے پاکستان پیپلز پارٹی کے سینئر رہنما سید خورشید شاہ نے کہا ہے کہ مشرق وسطیٰ میں جاری کشیدگی پاکستان کے لیے معاشی مشکلات میں اضافے کا باعث بن سکتی ہے۔ انہوں نے خبردار کیا کہ عالمی سطح پر شروع ہونے والی یہ معاشی جنگ پاکستان کے لیے بڑے مسائل پیدا کر سکتی ہے، اس لیے ضروری ہے کہ پاکستان اس جنگ کو رکوانے کے لیے اپنا فعال کردار ادا کرے۔
سید خورشید شاہ نے الزام عائد کیا کہ بھارت اور اسرائیل افغانستان کو پاکستان کے خلاف استعمال کر رہے ہیں۔ انہوں نے کہا کہ جو رویہ افغانستان اپنائے ہوئے ہے، کوئی دوسرا اسلامی ملک ایسی مثال پیش نہیں کر سکتا۔ پیپلز پارٹی کے رہنما نے مزید کہا کہ افغان حکومت پاکستان کے عوام کی مہمان نوازی کا جواب دشمنی سے دے رہی ہے۔
مشرق وسطیٰ کی صورتحال پر تبصرہ کرتے ہوئے خورشید شاہ کا کہنا تھا کہ اگر امریکہ کو اندازہ ہوتا کہ یہ جنگ دو ہفتوں سے زیادہ طویل ہو جائے گی تو وہ اس میں مداخلت نہ کرتا۔ انہوں نے کہا کہ یہ تنازع اب ایران اور امریکہ کے درمیان ایک معاشی جنگ میں تبدیل ہو چکا ہے جس کے اثرات پوری دنیا میں محسوس کیے جا رہے ہیں۔
انہوں نے کہا کہ دنیا کے تمام ممالک امریکہ کے ساتھ بہتر تعلقات کے خواہشمند تھے مگر اب وہ پیچھے ہٹ رہے ہیں۔ خورشید شاہ نے مشورہ دیا کہ ایران کو ان ممالک پر حملہ نہیں کرنا چاہیے جہاں امریکی اڈے موجود نہیں ہیں۔ انہوں نے مزید کہا کہ ایران نے بہت نقصانات اٹھائے ہیں لیکن اس کے باوجود وہ مضبوطی سے کھڑا ہے۔
