بغداد میں مغربی صوبے الانبار کے قریب عوامی موبلائزیشن فورسز کے ایک مرکز پر فضائی حملے کے نتیجے میں سات عراقی فوجی ہلاک جبکہ تیرہ زخمی ہوگئے ہیں۔ سیکیورٹی ذرائع اور وزارت دفاع کے مطابق یہ واقعہ بدھ کی صبح مقامی وقت کے مطابق نو بجے پیش آیا۔
وزارت دفاع کی جانب سے جاری بیان میں کہا گیا ہے کہ فضائی کارروائی میں ایک ملٹری کلینک اور قریبی انجینئرنگ یونٹ کو نشانہ بنایا گیا۔ واقعے کے بعد امدادی ٹیمیں جائے وقوعہ پر پہنچ گئیں اور ملبے تلے مزید ہلاکتوں کے خدشے کے پیش نظر تلاش کا کام جاری ہے۔
عراقی وزارت دفاع نے اس حملے کو بین الاقوامی قوانین اور طبی تنصیبات کے تحفظ سے متعلق اصولوں کی سنگین خلاف ورزی قرار دیتے ہوئے شدید مذمت کی ہے۔ حکام کا کہنا ہے کہ یہ ایک خطرناک پیش رفت ہے اور اس کے ذمہ داروں کا تعین کیا جانا چاہیے۔
وزارت نے واضح کیا ہے کہ عراق اپنے دفاع کے لیے قانونی دائرہ کار کے اندر رہتے ہوئے جوابی کارروائی کا حق محفوظ رکھتا ہے۔
