گورنر خیبر پختونخوا فیصل کریم کنڈی نے پاکستان تحریک انصاف پر کڑی تنقید کرتے ہوئے کہا ہے کہ پی ٹی آئی نے متعدد بار عسکری نوعیت کی فورسز تشکیل دیں، انہیں واضح کرنا چاہیے کہ ان فورسز کے قیام کا اصل مقصد کیا ہے۔ انہوں نے کہا کہ بانی پی ٹی آئی کے صاحبزادے کی جانب سے ریاست مخالف بیانات سامنے آئے ہیں جو انتہائی تشویشناک ہیں۔
فیصل کریم کنڈی کا کہنا تھا کہ تحریک انصاف داخلی انتشار کا شکار ہے اور پارٹی قیادت شدید الجھن میں مبتلا ہے۔ انہوں نے کہا کہ جس ریاست نے انہیں شناخت دی، آج وہی لوگ اسے قاتل ریاست قرار دے رہے ہیں۔ انہوں نے خبردار کیا کہ ریاست کے خلاف نازیبا زبان استعمال کرنے والے اگر دوبارہ اسلام آباد کی جانب مارچ کی کوشش کریں گے تو انہیں سخت نتائج کا سامنا کرنا پڑے گا۔
گورنر نے صوبائی حکومت کو تنقید کا نشانہ بناتے ہوئے کہا کہ پی ٹی آئی رہنما صوابی سے آگے نکل کر زمینی حقائق کا ادراک کریں۔ انہوں نے کہا کہ اس وقت عالمی سطح پر پاکستان کی اہمیت بڑھ رہی ہے اور عالمی طاقتیں ملک پر توجہ دے رہی ہیں، جس کا سہرا فیلڈ مارشل کی کاوشوں کو جاتا ہے۔
فیصل کریم کنڈی نے وزیراعلیٰ خیبر پختونخوا کی کارکردگی کو غیر فعال قرار دیا اور کہا کہ صوبائی کابینہ میں اختلافات کھل کر سامنے آ چکے ہیں۔ وزیراعلیٰ کی تبدیلی کے حوالے سے انہوں نے کہا کہ یہ پی ٹی آئی کا اندرونی معاملہ ہے۔
گورنر نے مزید کہا کہ گزشتہ چار برسوں کے دوران بلدیاتی نمائندوں کو یکسر نظر انداز کیا گیا۔ انہوں نے الزام عائد کیا کہ فنڈز کی عدم فراہمی کے باعث مقامی نمائندوں اور ناظمین کی تنخواہیں تک روکی گئیں۔ انہوں نے صوبائی حکومت کی کفایت شعاری پالیسی پر طنز کرتے ہوئے کہا کہ حکومتی عہدیدار جمعرات کے روز ہی ایندھن بچانے کے بہانے اسلام آباد اور دیگر علاقوں میں اپنے گھروں کو روانہ ہو جاتے ہیں۔
