پاکستان انٹرنیشنل ایئرلائنز نے حج آپریشن دو ہزار چوبیس کی تیاریاں مکمل کر لی ہیں۔ سرکاری ذرائع کے مطابق پی آئی اے کی پری حج پروازوں کا سلسلہ اٹھارہ اپریل سے شروع ہو کر اکیس مئی تک جاری رہے گا۔
ابتدائی مرحلے کے دوران زائرین کو مدینہ منورہ اور جدہ پہنچایا جائے گا۔ قومی ایئرلائن دو سو دو پروازوں کے ذریعے ساٹھ ہزار سے زائد عازمین حج کو سعودی عرب منتقل کرے گی۔
مجموعی تعداد میں سے انچاس ہزار عازمین سرکاری حج اسکیم کے تحت سفر کریں گے جبکہ گیارہ ہزار افراد نجی حج اسکیم کے ذریعے فریضہ حج ادا کریں گے۔
پی آئی اے کی جانب سے ملک کے مختلف شہروں جن میں اسلام آباد، کراچی، لاہور، سیالکوٹ، کوئٹہ، فیصل آباد اور ملتان شامل ہیں سے براہ راست پروازیں چلائی جائیں گی۔
