برطانیہ کے وسطی شہر ڈربی میں ہفتے کی شب ایک کار نے پیدل چلنے والوں کو کچل دیا جس کے نتیجے میں سات افراد زخمی ہو گئے۔ پولیس نے کارروائی کرتے ہوئے واقعے میں ملوث ڈرائیور کو گرفتار کر لیا ہے۔
حکام کے مطابق یہ واقعہ مقامی وقت کے مطابق رات نو بج کر تیس منٹ پر پیش آیا۔ حادثے میں زخمی ہونے والے ساتوں افراد کو طبی امداد کے بعد ہسپتال منتقل کر دیا گیا ہے، جہاں ڈاکٹروں کا کہنا ہے کہ ان کی حالت خطرے سے باہر ہے۔
پولیس نے بتایا کہ جائے وقوعہ سے فرار ہونے والی گاڑی کو کچھ ہی دیر بعد روک لیا گیا اور تیس سالہ ڈرائیور کو حراست میں لے لیا گیا۔ گرفتار شخص کا تعلق بھارت سے بتایا گیا ہے۔
ملزم کے خلاف اقدامِ قتل، خطرناک ڈرائیونگ کے ذریعے شدید زخمی کرنے اور جان بوجھ کر نقصان پہنچانے کی دفعات کے تحت مقدمہ درج کر لیا گیا ہے۔ پولیس کا کہنا ہے کہ ملزم سے تفتیش جاری ہے تاہم ابھی تک واقعے کے محرکات واضح نہیں ہو سکے ہیں۔
پولیس ترجمان نے ایک بیان میں شہریوں کو یقین دلایا ہے کہ اس واقعے کے بعد عوام کو مزید کسی خطرے کا سامنا نہیں ہے اور صورتحال مکمل طور پر قابو میں ہے۔ حکام واقعے کی تحقیقات کے تمام پہلوؤں کا جائزہ لے رہے ہیں۔
