وزیر اعظم شہباز شریف اور سعودی عرب کے وزیر خارجہ شہزادہ فیصل بن فرحان السعود کے درمیان اسلام آباد میں اہم ملاقات ہوئی جس میں خطے میں قیام امن اور استحکام کے فروغ پر تفصیلی تبادلہ خیال کیا گیا۔
سعودی وزیر خارجہ کی وزیر اعظم ہاؤس آمد پر معاون خصوصی برائے امور خارجہ طارق فاطمی نے ان کا استقبال کیا۔ ملاقات میں نائب وزیر اعظم و وزیر خارجہ اسحاق ڈار اور قومی سلامتی کے مشیر لیفٹیننٹ جنرل عاصم ملک بھی شریک تھے۔
اس سے قبل سعودی وزیر خارجہ نے نائب وزیر اعظم اسحاق ڈار کے ساتھ الگ سے ملاقات کی۔ دفتر خارجہ کے اعلامیے کے مطابق دونوں رہنماؤں نے بدلتی ہوئی علاقائی اور عالمی صورتحال پر بات چیت کی اور خطے میں سیکیورٹی و استحکام کے لیے سفارت کاری اور مشترکہ کاوشوں کو ناگزیر قرار دیا۔
یہ اعلیٰ سطحی رابطے ایسے وقت میں ہوئے ہیں جب پاکستان سعودی عرب، مصر اور ترکی کے وزرائے خارجہ کے درمیان مذاکرات کی میزبانی کر رہا ہے۔ حکام کے مطابق ان بات چیت کا مقصد خطے میں کشیدگی کو کم کرنا اور باہمی تعاون کے فروغ کے لیے عملی اقدامات کرنا ہے۔
