برازیل کے شہر کیمپو ورڈے میں منعقدہ ہجرت کرنے والی جنگلی حیات کے تحفظ سے متعلق اقوام متحدہ کے کنونشن سی ایم ایس کے پندرہویں سربراہی اجلاس کے اختتام پر 40 نئی اقسام کو بین الاقوامی تحفظ کی فہرست میں شامل کرنے کا فیصلہ کیا گیا ہے۔ اس اہم عالمی کانفرنس میں 132 ممالک اور یورپی یونین کے نمائندوں نے شرکت کی۔
تحفظ کی نئی فہرست میں ہیری پوٹر فلموں میں دکھائی جانے والی مشہور سنوئی آؤل سمیت ہڈسونیئن گاڈوٹ اور گریٹ ہیمر ہیڈ شارک جیسی نایاب انواع شامل ہیں۔ اس کے علاوہ خشکی کے ممالیہ جانوروں میں دھاری دار لگڑبھگا اور آبی حیات میں دیو ہیکل اوٹر کو بھی تحفظ فراہم کیا جائے گا۔
سی ایم ایس کے رکن ممالک قانونی طور پر پابند ہیں کہ وہ خطرے سے دوچار انواع کے تحفظ، ان کے قدرتی مسکن کی بحالی اور ہجرت کے راستوں میں حائل رکاوٹوں کو دور کرنے کے لیے اقدامات کریں۔ یہ اجلاس برازیل کے حیاتیاتی تنوع سے مالا مال پینٹانال ویٹ لینڈز کے علاقے کیمپو ورڈے میں منعقد ہوا۔
اجلاس سے قبل جاری ہونے والی ایک رپورٹ کے مطابق سی ایم ایس کی فہرست میں شامل تقریباً 49 فیصد انواع کی تعداد میں کمی واقع ہو رہی ہے جبکہ ہر چار میں سے ایک نوع کو عالمی سطح پر معدومیت کا سامنا ہے۔ ایک اور رپورٹ میں خبردار کیا گیا ہے کہ میٹھے پانی کی مچھلیوں کی آبادی تیزی سے کم ہو رہی ہے جو دریاؤں کے نظام اور لاکھوں انسانوں کے روزگار کے لیے خطرہ ہے۔
ماہرین کا کہنا ہے کہ مسکن کی تباہی، ضرورت سے زیادہ ماہی گیری اور آبی آلودگی کے باعث دنیا بھر میں ہجرت کرنے والی سیکڑوں انواع کی بقا خطرے میں ہے۔ یاد رہے کہ برازیل نے گزشتہ نومبر میں ایمیزون کے شہر بیلیم میں کوپ 30 کلائمیٹ سمٹ کی میزبانی بھی کی تھی۔
