راولپنڈی پولیس نے کراچی سے تاوان کے لیے اغوا ہونے والی تین سالہ بچی کو ایک کامیاب کارروائی کے دوران بازیاب کروا لیا ہے۔ مغوی بچی کی رہائی کے لیے ملزمان کی جانب سے 50 لاکھ روپے تاوان کا مطالبہ کیا گیا تھا۔
پولیس ذرائع کے مطابق بچی نازیہ کو 11 مارچ کو کراچی کے علاقے گلشن معمار کی کچی آبادی سے نامعلوم ملزمان نے اغوا کیا تھا۔ بچی کے والد محمد اللہ خان، جو پیشے کے اعتبار سے کباڑی کا کام کرتے ہیں، کی مدعیت میں تھانہ گلشن معمار میں ایف آئی آر نمبر 139 درج کی گئی تھی۔
واقعے کے بعد کراچی پولیس کی ٹیکنیکل ونگ نے جدید ذرائع کا استعمال کرتے ہوئے ملزمان کے ٹھکانے کا سراغ لگایا۔ خفیہ معلومات ملنے پر کراچی پولیس نے راولپنڈی پولیس سے رابطہ کیا، جس کے بعد تھانہ دھمیال اور آر اے بازار پولیس کی مشترکہ ٹیموں نے ایک آپریشن شروع کیا۔
راولپنڈی کے علاقے غازی آباد میں کی گئی اس کارروائی کے نتیجے میں مغوی بچی کو بحفاظت بازیاب کروا لیا گیا۔ پولیس ترجمان کے مطابق بازیابی کے بعد بچی کو کراچی پولیس کے حوالے کر دیا گیا تھا، جس کے بعد کراچی پولیس کے افسران اسے گزشتہ روز اپنے ہمراہ کراچی لے گئے ہیں۔
