وزیراعلیٰ پنجاب مریم نواز شریف نے موٹرسائیکل مالکان کے لیے بڑے ریلیف پیکیج کا اعلان کر دیا ہے۔ اس اقدام کا مقصد عام آدمی کو بڑھتی ہوئی مہنگائی کے بوجھ سے نکالنا اور سفری اخراجات میں نمایاں کمی لانا ہے۔
نئے حکومتی فیصلے کے تحت پنجاب بھر میں موٹرسائیکلوں کی رجسٹریشن اور ٹرانسفر فیس مکمل طور پر ختم کر دی گئی ہے۔ اس کے علاوہ ہر رجسٹرڈ موٹرسائیکل مالک کو ماہانہ دو ہزار روپے کی سبسڈی فراہم کی جائے گی۔
پیکیج کے ایک اور اہم حصے کے تحت رجسٹرڈ موٹرسائیکل مالکان کو پیٹرول پر بھی رعایت ملے گی۔ شہری ماہانہ بیس لیٹر تک پیٹرول پر سو روپے فی لیٹر کی سبسڈی حاصل کر سکیں گے۔ حکام کا ماننا ہے کہ اس اقدام سے شہریوں کے سفری اخراجات میں نمایاں کمی آئے گی۔
سبسڈی کے حصول کے خواہشمند شہری ہیلپ لائن ایک ہزار پر کال کر سکتے ہیں، جبکہ مریم کو بتائیں ایپ اور سرکاری پورٹل کے ذریعے بھی درخواستیں جمع کرائی جا سکتی ہیں۔
وزیراعلیٰ پنجاب مریم نواز کا کہنا ہے کہ حکومت عوام کی معاشی مشکلات کم کرنے کے لیے دن رات کوشاں ہے اور یہ اقدامات اسی سلسلے کی ایک کڑی ہیں۔
ڈائریکٹر جنرل ایکسائز کے مطابق موٹرسائیکل مالکان کا ڈیٹا وفاقی حکومت کے ساتھ شیئر کر دیا گیا ہے۔ اہل افراد کو سبسڈی کی رقم براہ راست منتقل کرنے کے لیے ڈیجیٹل والٹ تیار کیے جا رہے ہیں۔
