ہیوسٹن میں جاری یو ایس مینز کلے کورٹ چیمپئن شپ کے سیمی فائنل میں ٹومی پال نے ایک سنسنی خیز مقابلے کے بعد فرانسس ٹیافو کو شکست دے کر پہلی بار اے ٹی پی کلے کورٹ فائنل کے لیے کوالیفائی کر لیا ہے۔ دو گھنٹے 45 منٹ تک جاری رہنے والے اس میچ میں بارش کے باعث 90 منٹ کا وقفہ بھی آیا۔ ٹومی پال نے 14 ایسز کی مدد سے 5-7، 6-4 اور 6-7 (7) سے کامیابی حاصل کی۔ اسی ٹورنامنٹ کے دوسرے سیمی فائنل میں ارجنٹینا کے رومان آندریس بروچاگا نے تھیاگو آگسٹن ٹیرانٹے کو باآسانی 1-6 اور 1-6 سے ہرا کر فائنل میں جگہ بنا لی ہے۔
مراکش کے شہر مراکش میں جاری گرانڈ پری حسن دوم ٹورنامنٹ میں ارجنٹینا کے کوالیفائر مارکو ٹرونجیلیٹی نے ٹاپ سیڈ اطالوی کھلاڑی لوشیانو ڈارڈیری کو 4-6 اور 6-7 (2) سے شکست دے کر فائنل کے لیے کوالیفائی کر لیا ہے۔ 36 سالہ ٹرونجیلیٹی اے ٹی پی ٹور کی تاریخ کے معمر ترین کھلاڑی بن گئے ہیں جو پہلی بار کسی ٹورنامنٹ کے فائنل میں پہنچے ہیں۔ فائنل میں ان کا مقابلہ اسپین کے رافیل جوڈر سے ہوگا، جنہوں نے سیمی فائنل میں ارجنٹینا کے کامیلو یوگو کارابیلی کو محض 63 منٹ میں 2-6 اور 1-6 سے شکست دی۔
رومانیہ کے دارالحکومت بخارسٹ میں جاری ٹریاک اوپن کے سیمی فائنل میں اسپین کے کوالیفائر ڈینیئل میریڈا ایگیولر نے ہنگری کے تیسرے سیڈ فیبیان ماروزسان کو اپ سیٹ شکست سے دوچار کیا ہے۔ ابتدائی سیٹ ہارنے کے بعد میریڈا ایگیولر نے شاندار واپسی کرتے ہوئے اگلے دونوں سیٹ 3-6 اور 1-6 سے اپنے نام کر لیے۔ انہوں نے میچ کے دوران 35 ونرز لگائے اور اپنے سروس گیمز کا بھرپور دفاع کرتے ہوئے کیریئر میں پہلی بار کسی ٹور لیول فائنل میں رسائی حاصل کی۔
