روس کے زیر کنٹرول کریمیا میں پیش آنے والے ایک فضائی حادثے میں روسی فضائیہ کے ایک اعلیٰ کمانڈر ہلاک ہو گئے ہیں۔ حکومتی عہدیداروں کے مطابق اس حادثے میں مجموعی طور پر 30 افراد کی جانیں ضائع ہوئیں۔
شمالی مرمنسک ریجن کے گورنر آندرے چیبس نے تصدیق کی ہے کہ ہلاک ہونے والوں میں ناردرن فلیٹ کی 45 ویں آرمی کے ایئر فورس اور ایئر ڈیفنس کے کمانڈر الیگزینڈر اوٹروشچینکو بھی شامل تھے۔
یہ حادثہ 31 مارچ کو اس وقت پیش آیا جب ایک ملٹری ٹرانسپورٹ طیارہ اے این 26 کریمیا میں ایک پہاڑی سے ٹکرا گیا۔ روسی وزارت دفاع نے ابتدائی تحقیقات کے بعد حادثے کی وجہ تکنیکی خرابی قرار دی تھی۔
اے این 26 طیارے 1960 کی دہائی کے اواخر سے زیر استعمال ہیں اور مال برداری کے لیے بھی استعمال کیے جاتے رہے ہیں۔ تاہم گزشتہ ایک دہائی کے دوران اس ماڈل کے متعدد جان لیوا حادثات پیش آ چکے ہیں۔
اس سے قبل 2022 میں یوکرین کے جنوب مشرقی علاقے زاپوریژیا میں ایک اے این 26 طیارہ گر کر تباہ ہوا تھا جس میں ایک شخص ہلاک ہوا تھا۔ اسی طرح 2020 میں یوکرین کے شمال مشرقی حصے میں ایک تربیتی پرواز کے دوران پیش آنے والے حادثے میں 27 افراد میں سے 26 ہلاک ہو گئے تھے۔
جنوبی سوڈان میں 2020 میں ہونے والے ایک حادثے میں پانچ روسی شہریوں سمیت آٹھ افراد جان سے ہاتھ دھو بیٹھے تھے، جبکہ 2017 میں آئیوری کوسٹ میں لینڈنگ کے دوران پیش آنے والے حادثے میں دس میں سے چار افراد ہلاک ہوئے تھے۔
