بیجنگ اور ریاض نے ایران اور امریکہ کے درمیان دو ہفتہ وار جنگ بندی کے قیام میں پاکستان کے سفارتی کردار کو سراہتے ہوئے خطے میں امن کے فروغ کے لیے کی جانے والی کوششوں کی حمایت کا اعلان کیا ہے۔
چینی وزارت خارجہ کی ترجمان ماؤ ننگ نے ایک پریس بریفنگ کے دوران کہا کہ بیجنگ پاکستان سمیت دیگر ممالک کی ثالثی کی کوششوں کی مکمل حمایت کرتا ہے۔ انہوں نے واضح کیا کہ چین نے خود بھی اس جنگ بندی کے عمل میں تعمیری کردار ادا کیا ہے۔
ترجمان نے اس بات پر زور دیا کہ چین ہمیشہ تنازعات کو فوجی کارروائیوں کے بجائے سیاسی اور سفارتی ذرائع سے حل کرنے کا حامی رہا ہے۔ ان کا کہنا تھا کہ ان کوششوں کا بنیادی مقصد مشرق وسطیٰ اور خلیجی خطے میں دیرپا امن کا قیام ہے۔
دوسری جانب سعودی وزارت خارجہ کے ترجمان نے بھی پاکستان کی کاوشوں کو خراج تحسین پیش کیا ہے۔ سعودی موقف کے مطابق ریاض پاکستان کی جانب سے پائیدار امن اور مستقل جنگ بندی کے حصول کے لیے کی جانے والی کوششوں کا خیرمقدم کرتا ہے اور امریکی صدر اور پاکستانی وزیراعظم کے اعلانات کی حمایت کرتا ہے۔
دریں اثنا متحدہ عرب امارات کے صدارتی مشیر انور قرقاش نے کہا ہے کہ یو اے ای نے کامیابی کے ساتھ اس جنگ کو ٹال دیا ہے جسے وہ روکنا چاہتا تھا۔ انہوں نے کہا کہ امارات نے اپنی خودمختاری، وقار اور کامیابیوں کا دفاع کیا ہے اور خطے کی پیچیدہ صورتحال کے باوجود ملک مضبوطی، استقامت اور استحکام کے ساتھ آگے بڑھ رہا ہے۔
