ٹانک میں سکیورٹی خدشات کے پیش نظر ضلعی انتظامیہ نے دفعہ 144 نافذ کر دی ہے۔ یہ فیصلہ سکیورٹی اداروں کی سفارشات اور ممکنہ خطرات کے تناظر میں کیا گیا ہے تاکہ علاقے میں امن و امان کی صورتحال کو برقرار رکھا جا سکے اور کسی بھی ناخوشگوار واقعے کو روکا جا سکے۔
ڈپٹی کمشنر ٹانک تنویر خان کے مطابق پابندی کا اطلاق 12 اپریل کو صبح 6 بجے سے شام 6 بجے تک رہے گا جس کا باقاعدہ نوٹیفکیشن جاری کر دیا گیا ہے۔
جاری کردہ نوٹیفکیشن کے مطابق کور فورٹ، خارگی جنڈولہ، گرداوی، نیلی کچھ اور گومل زیم ڈیم جانے والے تمام مرکزی راستے بند رہیں گے جبکہ جنڈولہ بازار بھی مکمل طور پر بند رہے گا۔
انتظامیہ نے واضح کیا ہے کہ قانون نافذ کرنے والے اداروں اور ہنگامی خدمات پر مامور عملے کو پابندی سے استثنیٰ حاصل ہوگا۔
انتہائی ضرورت کی صورت میں شہریوں کو پولیس یا سکیورٹی فورسز سے پیشگی اجازت لینا ہوگی اور شہریوں کو ہدایت کی گئی ہے کہ وہ دوران سفر اپنی شناختی دستاویزات ہمراہ رکھیں۔
