اسرائیلی وزیراعظم بنجمن نیتن یاہو نے واضح کیا ہے کہ ایران کے خلاف جاری مہم ابھی ختم نہیں ہوئی ہے۔ لبنان کے ساتھ امن مذاکرات کی حمایت کے باوجود نیتن یاہو کا کہنا ہے کہ ایران کے خلاف کارروائیاں بدستور جاری رہیں گی۔
تل ابیب سے موصولہ اطلاعات کے مطابق نیتن یاہو نے اپنے بیان میں کہا ہے کہ ہم اب بھی ان کے خلاف لڑ رہے ہیں اور ابھی بہت کچھ کرنا باقی ہے۔ یہ صورتحال ایک ایسے وقت میں سامنے آئی ہے جب پاکستان کی ثالثی میں امریکہ اور ایران کے درمیان مذاکرات کا عمل جاری ہے۔
اسرائیلی وزیراعظم نے اپنی عسکری مہم کی کامیابیوں کا دعویٰ کرتے ہوئے کہا کہ ایران کے جوہری پروگرام کو کافی حد تک ناکارہ بنایا گیا ہے۔ تاہم انہوں نے اعتراف کیا کہ ایران کے پاس اب بھی افزودہ مواد موجود ہے جسے ختم کرنا ضروری ہے۔
نیتن یاہو نے ڈونلڈ ٹرمپ کا حوالہ دیتے ہوئے زور دیا کہ ایران کے جوہری مواد کو یا تو کسی معاہدے کے ذریعے تلف کیا جائے یا پھر دوسرے ذرائع استعمال کیے جائیں۔ واضح رہے کہ اس سے قبل پاکستان میں ہونے والے مذاکرات کے بعد امریکی وفد بغیر کسی حتمی نتیجے کے واپس روانہ ہو چکا ہے۔
