روسی صدر ولادیمیر پیوٹن اور ایرانی صدر مسعود پزشکیان کے درمیان ٹیلی فونک رابطہ ہوا ہے جس میں اسلام آباد میں جاری امریکہ اور ایران کے درمیان مذاکرات اور مشرق وسطیٰ کی مجموعی سکیورٹی صورتحال پر تفصیلی تبادلہ خیال کیا گیا۔ روسی میڈیا کے مطابق دونوں رہنماؤں نے خطے کی موجودہ کشیدہ صورتحال اور سفارتی کوششوں کا جائزہ لیا۔
صدر ولادیمیر پیوٹن نے گفتگو کے دوران کہا کہ روس مشرق وسطیٰ میں جاری کشیدگی کے خاتمے کا خواہاں ہے اور تنازعات کے پرامن حل کی حمایت کرتا ہے۔ انہوں نے واضح کیا کہ ماسکو خطے میں کشیدگی کم کرنے کی ہر ممکن کوشش میں سہولت کاری کے لیے تیار ہے۔
ایرانی صدر مسعود پزشکیان نے خطے میں کشیدگی کم کرنے کے حوالے سے روس کے اصولی موقف کو سراہا۔ انہوں نے مشکل وقت میں ایرانی عوام کے لیے روسی انسانی امداد فراہم کرنے پر صدر پیوٹن کا خصوصی شکریہ بھی ادا کیا۔
دونوں سربراہان مملکت نے روس اور ایران کے درمیان دوطرفہ تعلقات کو مزید وسعت دینے اور مختلف شعبوں میں باہمی تعاون کو مضبوط بنانے کے عزم کا اعادہ کیا۔ اس موقع پر ایرانی صدر نے ولادیمیر پیوٹن اور روس میں مقیم تمام آرتھوڈوکس مسیحیوں کو ایسٹر کے تہوار پر مبارکباد بھی پیش کی۔
