لبنان نے اسرائیل کے ساتھ کسی بھی قسم کے رابطے سے لاعلمی کا اظہار کر دیا ہے۔ یہ بیان ایک ایسے وقت میں سامنے آیا ہے جب امریکی صدر ڈونلڈ ٹرمپ نے دعویٰ کیا تھا کہ دونوں ممالک کے رہنما جمعرات کے روز باہمی گفتگو کریں گے۔
فرانسیسی خبر رساں ادارے اے ایف پی کے مطابق لبنانی حکومتی ذرائع نے واضح کیا ہے کہ انہیں اسرائیلی فریق کے ساتھ کسی بھی منصوبہ بند رابطے کے بارے میں کوئی اطلاع نہیں ہے۔ سرکاری ذرائع کا کہنا ہے کہ سرکاری چینلز کے ذریعے انہیں اس سلسلے میں کسی بھی پیش رفت سے آگاہ نہیں کیا گیا۔
دوسری جانب امریکی صدر ڈونلڈ ٹرمپ نے اپنے سوشل میڈیا پلیٹ فارم ٹروتھ سوشل پر ایک بیان میں کہا تھا کہ واشنگٹن اسرائیل اور لبنان کے درمیان کشیدگی کم کرنے کے لیے کوشاں ہے۔ انہوں نے مزید کہا کہ دونوں ممالک کے رہنماؤں کے درمیان 34 برس سے کوئی بات چیت نہیں ہوئی ہے اور اب یہ رابطہ جمعرات کو متوقع ہے۔
