وزیر اعظم شہباز شریف اپنے تین ملکی دورے کے آخری مرحلے میں ترکیہ پہنچ گئے ہیں۔ یہ دورہ مشرق وسطیٰ میں جاری کشیدگی کے خاتمے اور قیام امن کے لیے کی جانے والی سفارتی کوششوں کا حصہ ہے۔
وزیر اعظم اس سے قبل سعودی عرب اور قطر کا دورہ مکمل کر چکے ہیں۔ ان کا یہ دورہ جمعہ تک جاری رہے گا جس کا مقصد خطے میں درپیش بحرانی صورتحال پر پاکستان کا موقف اجاگر کرنا اور عالمی سطح پر روابط کو بڑھانا ہے۔
انتالیا پہنچنے پر گورنر ہلوسی شاہین نے وزیر اعظم شہباز شریف اور ان کے وفد کا پرتپاک استقبال کیا۔ اس موقع پر ترکیہ میں تعینات پاکستانی سفیر یوسف جنید اور اعلیٰ سفارتی حکام بھی ایئرپورٹ پر موجود تھے۔
وزیر اعظم کے دفتر سے جاری بیان کے مطابق شہباز شریف پانچویں انتالیا ڈپلومیسی فورم میں شرکت کریں گے۔ وہ فورم کے لیڈرز پینل سے خطاب کریں گے جس میں مشرق وسطیٰ کی صورتحال پر پاکستان کا نقطہ نظر پیش کیا جائے گا۔
دورے کے دوران وزیر اعظم کی ترک صدر رجب طیب اردوان اور دیگر عالمی رہنماؤں سے ملاقاتیں متوقع ہیں۔ ملاقاتوں میں دو طرفہ تعلقات اور خطے کی صورتحال پر تبادلہ خیال کیا جائے گا۔
وزیر اعظم کے ہمراہ جانے والے وفد میں نائب وزیر اعظم اور وزیر خارجہ اسحاق ڈار، وزیر اطلاعات و نشریات عطا اللہ تارڑ، معاون خصوصی طارق فاطمی اور بین الاقوامی میڈیا کے لیے وزیر اعظم کے ترجمان مشاہد زیدی شامل ہیں۔
