پوپ لیو اپنے چار ملکی افریقی دورے کے تیسرے مرحلے میں ہفتے کے روز انگولا پہنچ رہے ہیں۔ تیل سے مالا مال اس ملک میں متوقع قیام کے دوران پوپ کی جانب سے قدرتی وسائل کے استحصال کے معاملے پر سخت موقف اختیار کیے جانے کا امکان ہے۔ پوپ لیو اپنے افریقی دورے کے دوران ایک نئے اور جارحانہ انداز میں گفتگو کر رہے ہیں۔
پوپ لیو اس سے قبل کیمرون کا دورہ مکمل کر کے انگولا پہنچیں گے، جہاں انہوں نے جمعرات کے روز اپنے بیان میں دنیا کو چند ظالم حکمرانوں کے ہاتھوں تباہی سے تعبیر کیا تھا۔ کیمرون سے روانگی سے قبل انہوں نے دارالحکومت یاؤنڈے میں ایک الوداعی تقریب سے خطاب کرتے ہوئے عوام پر زور دیا کہ وہ مشکلات کے باوجود امید کا دامن ہاتھ سے نہ چھوڑیں۔ انہوں نے کہا کہ جب سب کچھ تاریک دکھائی دیتا ہے، تب بھی یسوع مسیح انسان کے ساتھ ہوتے ہیں جو ہر قسم کی شیطانی طاقت سے زیادہ مضبوط ہیں۔
امریکی نژاد پوپ لیو ہفتے کی سہ پہر تین بجے انگولا کے دارالحکومت لوانڈا پہنچیں گے جہاں ان کی ملاقات صدر جواؤ لورینکو سے طے ہے۔ پوپ ملکی سیاسی قیادت سے بھی خطاب کریں گے۔ انگولا کی کل آبادی تین کروڑ چھیاسٹھ لاکھ نفوس پر مشتمل ہے جن میں سے نصف سے زائد کیتھولک عقیدے کے پیروکار ہیں۔
ورلڈ بینک کے اعداد و شمار کے مطابق انگولا کی تیس فیصد سے زائد آبادی یومیہ دو ڈالر پندرہ سینٹ سے کم آمدنی پر گزارا کرنے پر مجبور ہے اور شدید غربت کا شکار ہے۔ تیل کی دولت سے مالا مال ہونے کے باوجود ملک کی برآمدات کا پچانوے فیصد انحصار تیل پر ہے۔
پوپ لیو نے اپنے دورہ افریقہ کے دوران جنگ اور عدم مساوات کے خلاف سخت بیانات دیے ہیں۔ حال ہی میں ایران جنگ پر تنقید کے بعد انہیں صدر ڈونلڈ ٹرمپ کی جانب سے شدید تنقید کا سامنا بھی کرنا پڑا ہے۔ کیمرون میں ان کے استقبال کے لیے عوام میں زبردست جوش و خروش پایا گیا، جہاں جمعہ کے روز ڈوالا میں منعقدہ تقریب میں تقریباً ایک لاکھ بیس ہزار افراد نے شرکت کی۔
