بھارتی مسابقتی کمیشن نے ایپل کی جانب سے مطلوبہ مالیاتی کوائف فراہم نہ کرنے پر سخت برہمی کا اظہار کرتے ہوئے کیس کی حتمی سماعت کی تاریخ اکیس مئی مقرر کر دی ہے۔ امریکی ٹیکنالوجی کمپنی پر الزام ہے کہ اس نے آئی فون ایپ مارکیٹ میں اپنی اجارہ داری کا غلط استعمال کیا ہے۔
کمیشن کے آٹھ اپریل کے حکم نامے کے مطابق ایپل نے اکتوبر دو ہزار چوبیس سے اب تک تحقیقاتی رپورٹ پر اپنے تحفظات اور مالیاتی تفصیلات جمع نہیں کرائیں۔ کمپنی کی جانب سے موقف اختیار کیا گیا ہے کہ معاملہ دہلی ہائی کورٹ میں زیر سماعت ہے جہاں انہوں نے انسدادِ اجارہ داری کے قانون کو چیلنج کر رکھا ہے۔
ذرائع کے مطابق ایپل کو خدشہ ہے کہ اگر عالمی ٹرن اوور کی بنیاد پر جرمانہ عائد کیا گیا تو یہ رقم اڑتیس ارب ڈالر تک پہنچ سکتی ہے۔ کمپنی نے اپنے اوپر عائد تمام الزامات کو مسترد کرتے ہوئے کہا ہے کہ بھارت میں ان کا مارکیٹ شیئر نو فیصد ہے اور اینڈرائیڈ فونز کے مقابلے میں وہ ایک چھوٹا کھلاڑی ہے۔
بھارتی کمیشن نے ایپل کی جانب سے کارروائی روکنے کی استدعا مسترد کر دی ہے۔ حکام کا کہنا ہے کہ کمپنی قانونی عمل کو التواء میں ڈالنے کی کوشش کر رہی ہے۔ کمیشن نے ایپل کو جواب جمع کرانے کے لیے مزید دو ہفتوں کی مہلت دی ہے تاہم حتمی سماعت کی تاریخ مقرر کرنا اس بات کا اشارہ ہے کہ ریگولیٹری ادارے کا موقف سخت ہو چکا ہے۔
قانونی ماہرین کے مطابق اگر ایپل نے آڈیٹر کی تصدیق شدہ مالیاتی تفصیلات جمع نہ کرائیں تو جرمانے کے تعین کے دوران ان کے پاس دفاع کا موقع محدود ہو جائے گا۔ یہ کیس دو ہزار اکیس میں ایک غیر سرکاری تنظیم کی شکایت پر شروع ہوا تھا جس میں بعد ازاں ٹنڈر کی مالک کمپنی میچ اور کئی مقامی اسٹارٹ اپس بھی شامل ہو گئے تھے۔
ایپل اور بھارتی مسابقتی کمیشن نے اس معاملے پر تاحال کوئی باضابطہ جواب نہیں دیا ہے۔ یہ کیس دنیا بھر میں ایپل کے خلاف جاری ان متعدد تحقیقات میں سے ایک ہے جن میں کمپنی پر مارکیٹ میں غیر منصفانہ مسابقت کا الزام عائد کیا گیا ہے۔
