آسٹریلیا کے مشرقی ساحل پر صبح کی سیر کے دوران سمندر میں طغیانی آنے سے سات سیاح ایک چٹان پر پھنس گئے۔ متاثرہ گروپ میں تین بچے بھی شامل تھے۔ سمندر میں سولہ فٹ اونچی لہریں مسلسل بلند ہو رہی تھیں جس کے باعث سیاحوں نے اپنی جان بچانے کے لیے چٹان کے ایک کونے پر پناہ لی۔
مقامی ایمرجنسی سروسز کے کمانڈر پیٹ کولنز نے صورتحال کی سنگینی کا ذکر کرتے ہوئے کہا کہ اگر لہریں مزید بلند ہو جاتیں تو سیاحوں کا پانی میں بہہ جانا یقینی تھا تاہم خوش قسمتی سے ان کے پاس موبائل فون موجود تھے جس کی مدد سے انہوں نے پولیس کو اطلاع دی۔
امدادی ٹیموں نے ابتدا میں ہیلی کاپٹر کے ذریعے ریسکیو آپریشن کی کوشش کی مگر ہیلی کاپٹر کے پنکھوں کی ہوا سے پیدا ہونے والا دباؤ سیاحوں کو سمندر میں دھکیل سکتا تھا جس کے باعث یہ منصوبہ ترک کر دیا گیا۔
بعد ازاں ریسکیو اہلکاروں نے ایریزونا ورٹیکس نامی خصوصی آلے اور رسیوں کی مدد سے تین گھنٹے طویل آپریشن کے بعد سیاحوں کو بحفاظت نکال لیا۔ پیٹ کولنز کے مطابق یہ آلہ چٹانوں کے نوکیلے کناروں سے رسیوں کو کٹنے سے بچانے میں انتہائی مددگار ثابت ہوا۔
اس کامیاب کارروائی میں حصہ لینے والے تمام آسٹریلوی ریسکیو ورکرز رضاکار ہیں جنہوں نے بتایا کہ وہ برسوں سے اس نوعیت کے ہنگامی حالات سے نمٹنے کی تربیت حاصل کر رہے تھے۔
