مظفرآباد میں وزیراعظم آزاد کشمیر فیصل ممتاز راٹھور کی زیر صدارت کابینہ کا اجلاس منعقد ہوا جس میں متفقہ طور پر ایک قرارداد منظور کی گئی جس میں مشرق وسطیٰ میں امن کے فروغ کے لیے پاکستان کی عسکری اور سیاسی قیادت کے کردار کو سراہا گیا ہے۔ کابینہ نے صدر آصف علی زرداری، وزیراعظم شہباز شریف اور آرمی چیف جنرل سید عاصم منیر کی سفارتی کوششوں کو خراج تحسین پیش کرتے ہوئے کہا کہ امریکہ اور ایران کے درمیان اہم روابط میں پاکستان کا کردار ایک امن پسند ملک کے طور پر عالمی سطح پر تسلیم کیا گیا ہے۔ کابینہ کے مطابق اعلیٰ قیادت کے فعال کردار نے پاکستان کا عالمی وقار بلند کیا ہے جو پاکستان اور آزاد کشمیر کے عوام کے لیے باعث فخر ہے۔
کابینہ نے ایک اور قرارداد میں گزشتہ برس پیش آنے والے پہلگام واقعے کو بھارت کی جانب سے اپنے سیاسی اور عسکری مقاصد کے حصول کے لیے رچایا گیا فالس فلیگ آپریشن قرار دیا ہے۔ کابینہ نے اس تشویش کا اظہار کیا کہ یہ واقعہ مقبوضہ کشمیر میں جاری ریاستی جبر اور فوجی کارروائیوں کو جواز فراہم کرنے کی حکمت عملی کا حصہ ہے۔ اجلاس میں مقبوضہ علاقے میں ماورائے عدالت قتل، جبری گمشدگیوں اور غیر قانونی گرفتاریوں سمیت انسانی حقوق کی سنگین خلاف ورزیوں کی شدید مذمت کی گئی۔
کابینہ کا کہنا تھا کہ اظہار رائے پر پابندیاں اور مواصلاتی بلیک آؤٹ زمینی حقائق کو چھپانے کے لیے استعمال کیے جا رہے ہیں۔ ان اقدامات کو بین الاقوامی قوانین اور بنیادی انسانی حقوق کے منافی قرار دیتے ہوئے مطالبہ کیا گیا کہ پہلگام سمیت تمام مشکوک واقعات کی شفاف اور غیر جانبدارانہ بین الاقوامی تحقیقات کروائی جائیں۔ کابینہ نے عالمی برادری اور بالخصوص اقوام متحدہ پر زور دیا کہ وہ مقبوضہ کشمیر کی صورتحال کا نوٹس لیں اور کشمیریوں کو اقوام متحدہ کی قراردادوں کے مطابق حق خود ارادیت دلوانے میں اپنا کردار ادا کریں۔
کابینہ نے اعادہ کیا کہ تنازعہ کشمیر ایک عالمی سطح پر تسلیم شدہ مسئلہ ہے جسے اقوام متحدہ کی قراردادوں کے مطابق پرامن طریقے سے حل کیا جانا چاہیے۔ اجلاس میں حریت رہنما شبیر احمد شاہ کی بھارتی سپریم کورٹ سے ضمانت کے باوجود دوبارہ گرفتاری اور آسیہ اندرابی سمیت ان کے ساتھیوں کو عمر قید کی سزا کو انصاف کا قتل قرار دیا گیا۔ کابینہ نے مسرت عالم بھٹ، شبیر احمد شاہ، یاسین ملک، آسیہ اندرابی اور تہاڑ جیل سمیت دیگر قیدخانوں میں بند کشمیری رہنماؤں کی فوری رہائی کا مطالبہ کیا۔ آخر میں عالمی برادری سے اپیل کی گئی کہ وہ جنوبی ایشیا میں پائیدار امن کے قیام کے لیے کشمیر پر اقوام متحدہ کی قراردادوں پر عملدرآمد کے لیے کوششیں تیز کریں۔
