لاہور کے علاقے گجر پورہ میں واقع کباڑ کے گودام میں آتشزدگی کے المناک واقعے کے نتیجے میں تین کمسن بچے جھلس کر جاں بحق ہو گئے۔
ریسکیو حکام کے مطابق یہ افسوسناک واقعہ چائنہ اسکیم کے قریب پیش آیا جہاں کباڑ کے ایک گودام میں اچانک آگ بھڑک اٹھی جس نے دیکھتے ہی دیکھتے شدت اختیار کر لی۔
آتشزدگی کے اس واقعے میں چھ سالہ علیزہ، چار سالہ علی احمد اور دو سالہ فضا شدید جھلس گئے تھے۔ متاثرہ بچوں کو فوری طور پر طبی امداد کے لیے ہسپتال منتقل کیا گیا تاہم وہ زخموں کی تاب نہ لاتے ہوئے دم توڑ گئے۔
واقعے کے بعد علاقے میں خوف و ہراس پھیل گیا ہے۔ حکام کا کہنا ہے کہ آگ لگنے کی فوری وجہ تاحال معلوم نہیں ہو سکی ہے جس کی تحقیقات جاری ہیں۔
