فیڈریشن آف پاکستان چیمبرز آف کامرس اینڈ انڈسٹری (ایف پی سی سی آئی) کے صدر عاطف اکرام شیخ نے اعلان کیا ہے کہ ادارہ اسلامک چیمبر آف کامرس اینڈ ڈویلپمنٹ (آئی سی سی ڈی) کے اشتراک سے 14 مئی 2026 کو کراچی میں آئی سی سی ڈی ہیڈکوارٹرز میں ایگری فوڈ گلوبل انویسٹمنٹ اینڈ پارٹنرشپ کانفرنس اور ایکسپو کا انعقاد کرے گا۔
عاطف اکرام شیخ کا کہنا ہے کہ یہ اقدام سرمایہ کاری کو فروغ دینے، بین الاقوامی شراکت داری کو مستحکم کرنے اور پاکستان کی زرعی اور زرعی بنیادوں پر قائم صنعتوں کی وسیع صلاحیتوں کو اجاگر کرنے کے عزم کا عکاس ہے۔
ایف پی سی سی آئی کے صدر نے اس بات پر زور دیا کہ یہ ایونٹ تجارتی روابط بڑھانے، سرمایہ کاری کو راغب کرنے اور ملکی معیشت کی ریڑھ کی ہڈی سمجھے جانے والے شعبہ زراعت کی صلاحیتوں کو دنیا کے سامنے پیش کرنے کے لیے ایک اہم پلیٹ فارم ثابت ہوگا۔
کانفرنس کی کامیابی کو یقینی بنانے کے لیے تمام صوبوں کے ایگریکلچر چیمبرز کے نمائندوں کے علاوہ کھاد، بیج، کیڑے مار ادویات اور متعلقہ صنعتوں کے رہنماؤں اور ماہرین تعلیم کو مدعو کیا جائے گا۔ اس تقریب میں نمایاں چیمبرز آف کامرس کے عہدیداران بھی شرکت کریں گے۔
عاطف اکرام شیخ نے مزید کہا کہ بدلتی ہوئی علاقائی اور عالمی صورتحال کے پیش نظر اس کانفرنس میں بین الاقوامی مندوبین اور سفارتی برادری کے ارکان کی شرکت کو بھی یقینی بنایا جائے گا۔ انہوں نے آئی سی سی ڈی کے ساتھ تعاون کی روایت کو برقرار رکھتے ہوئے اس ایونٹ کے کامیاب انعقاد کے لیے مکمل تعاون کا یقین دلایا ہے۔
