نائب وزیراعظم اور وزیر خارجہ سینیٹر محمد اسحاق ڈار اور برطانوی سیکریٹری خارجہ ایویٹ کوپر کے درمیان ٹیلی فونک رابطہ ہوا ہے۔ دفتر خارجہ کے ترجمان کے مطابق دونوں رہنماؤں نے بدلتی ہوئی علاقائی صورتحال اور اہم پیش رفت پر تبادلہ خیال کیا۔
برطانوی سیکریٹری خارجہ ایویٹ کوپر نے خطے میں امن کے قیام اور فریقین کے مابین مصالحت کے فروغ کے لیے پاکستان کی کوششوں کو سراہا۔ انہوں نے خطے میں قیام امن کے لیے اسلام آباد کے کردار کو انتہائی اہمیت کا حامل قرار دیا۔
اس موقع پر وزیر خارجہ اسحاق ڈار نے اس عزم کا اعادہ کیا کہ پاکستان مذاکرات اور سفارت کاری کے ذریعے امن کے فروغ کے لیے پرعزم ہے۔ انہوں نے واضح کیا کہ پاکستان خطے میں کشیدگی کے خاتمے کے لیے اپنی مثبت کوششیں جاری رکھے گا۔
بات چیت کے دوران دونوں رہنماؤں نے جاری تنازعات کے عالمی معیشت پر پڑنے والے اثرات اور دیگر وسیع تر جہتوں کا بھی جائزہ لیا۔
ترجمان دفتر خارجہ کے مطابق پاکستان اور برطانیہ نے دوطرفہ امور کے ساتھ ساتھ علاقائی اور عالمی سطح پر ہونے والی پیش رفت پر قریبی رابطے برقرار رکھنے پر اتفاق کیا ہے۔
