وزیراعظم شہباز شریف نے متحدہ عرب امارات کی شہری تنصیبات پر میزائل اور ڈرون حملوں کی شدید مذمت کی ہے۔ انہوں نے ان حملوں کے تناظر میں پاکستان کی جانب سے مکمل یکجہتی کا اظہار کرتے ہوئے خطے میں امن و استحکام کے لیے جنگ بندی کے احترام پر زور دیا ہے۔
سماجی رابطے کی ویب سائٹ ایکس پر اپنے پیغام میں وزیراعظم نے شیخ محمد بن زاید النہیان سے اظہار یکجہتی کرتے ہوئے کہا کہ پاکستان اس مشکل گھڑی میں اماراتی عوام اور حکومت کے ساتھ کھڑا ہے۔ انہوں نے مزید کہا کہ خطے میں پائیدار امن اور مذاکرات کے لیے سفارتی گنجائش پیدا کرنے کی خاطر جنگ بندی کا احترام ناگزیر ہے۔
ادھر متحدہ عرب امارات کے علاقے فجیرہ میں پیر کے روز آئل انڈسٹری زون میں آگ لگنے کا واقعہ پیش آیا۔ فجیرہ میڈیا آفس کے مطابق یہ آگ ڈرون حملے کے نتیجے میں لگی جس کا مبینہ تعلق ایران سے بتایا گیا ہے۔ واقعے کے فوری بعد سول ڈیفنس کی ٹیموں نے موقع پر پہنچ کر آگ پر قابو پانے کی کارروائی شروع کر دی۔
دوسری جانب ایران کی جانب سے دعویٰ کیا گیا کہ انہوں نے آبنائے ہرمز میں داخل ہونے والے ایک امریکی جنگی جہاز کو انتباہ جاری کر کے واپس جانے پر مجبور کر دیا۔ ایرانی خبر رساں ادارے فارس نے دعویٰ کیا کہ آبنائے کے جنوبی داخلی راستے پر واقع بندرگاہ جاسک کے قریب دو میزائلوں نے امریکی جہاز کو نشانہ بنایا۔
تاہم امریکی حکام نے ان رپورٹس کی سختی سے تردید کی ہے۔ امریکی عہدیداروں کا کہنا ہے کہ کسی بھی امریکی جنگی جہاز پر میزائل حملے کی خبروں میں کوئی صداقت نہیں ہے اور اس نوعیت کی اطلاعات بے بنیاد ہیں۔ ایران کی جانب سے ان میزائل حملوں کے دعوے پر تاحال کوئی باضابطہ ردعمل سامنے نہیں آیا ہے۔
