اسلام آباد میں وزارت اطلاعات و نشریات کے زیر اہتمام ایک خصوصی تقریب کے دوران معرکہ حق کے نام سے تصویری کتاب کا اجرا کیا گیا ہے۔ اس تقریب میں وفاقی وزراء، اعلیٰ حکومتی عہدیداروں اور پالیسی سازوں نے شرکت کی تاکہ پاکستان کے قومی بیانیے اور تاریخی تناظر کو اجاگر کیا جا سکے۔
کتاب کی نقاب کشائی وفاقی وزیر دفاع خواجہ محمد آصف، وفاقی وزیر اطلاعات و نشریات عطا اللہ تارڑ، پارلیمانی سیکرٹری برائے اطلاعات بیرسٹر دانیال چوہدری اور سیکرٹری اطلاعات اشفاق احمد خلیل نے مشترکہ طور پر کی۔ حکام کا کہنا ہے کہ یہ کتاب قومی استقامت اور قربانیوں کی ایک جامع دستاویز ہے۔
وزیر دفاع خواجہ محمد آصف نے تقریب سے خطاب کرتے ہوئے کہا کہ بھارت میں اقلیتیں بدترین مظالم کا شکار ہیں اور نئی دہلی نے پلوامہ جیسے ڈرامائی واقعات کے ذریعے عالمی برادری کو گمراہ کرنے کی کوشش کی۔ انہوں نے کہا کہ خطے میں امن کو بھارت کی جارحانہ پالیسیوں سے خطرہ ہے اور بھارت فتنہ الہند اور فتنہ الخوارج جیسے عناصر کی حمایت کر کے علاقائی استحکام کو نقصان پہنچا رہا ہے۔
خواجہ آصف نے مزید کہا کہ معرکہ حق محض صفحات کا مجموعہ نہیں بلکہ قومی عزم اور قربانیوں کی داستان ہے۔ انہوں نے زور دیا کہ پاکستان کی مسلح افواج نے دشمن کے مذموم عزائم کو ناکام بنایا ہے اور قومی یکجہتی ہی ملک کا سب سے بڑا اثاثہ ہے۔
وفاقی وزیر اطلاعات عطا اللہ تارڑ نے اس موقع پر کہا کہ عالمی برادری نے بھارت کے جھوٹے بیانیے کو مسترد کر دیا ہے اور اب پاکستان کا موقف عالمی سطح پر زیادہ پذیرائی حاصل کر رہا ہے۔
تقریب سے خطاب کرتے ہوئے لیفٹیننٹ جنرل (ر) عامر ریاض نے قیام پاکستان کے تاریخی پس منظر پر روشنی ڈالی اور کہا کہ لاکھوں مسلمانوں نے آزادی کی جدوجہد میں اپنی جانوں کا نذرانہ پیش کیا۔ انہوں نے آر ایس ایس کے ہندوتوا نظریے پر تنقید کرتے ہوئے کہا کہ بھارت نے پاکستان کو سفارتی تنہائی کا شکار کرنے کی ناکام کوشش کی۔
انہوں نے پہلگام جیسے واقعات کو فالس فلیگ آپریشن قرار دیتے ہوئے کہا کہ پاکستانی ریاستی اداروں نے مربوط انداز میں ان کا جواب دیا ہے۔ انہوں نے مزید کہا کہ پاکستان کا میڈیا دشمن کے پروپیگنڈے کا مقابلہ کرنے میں کلیدی کردار ادا کر رہا ہے۔ تقریب کے شرکاء نے اس بات پر اتفاق کیا کہ معرکہ حق سیاسی، عسکری اور سماجی پہلوؤں کا احاطہ کرتی ہے اور یہ کتاب قومی یکجہتی کے فروغ میں معاون ثابت ہوگی۔
