وفاقی وزیر داخلہ و انسداد منشیات محسن نقوی اور بنگلہ دیش کے وزیر داخلہ صلاح الدین احمد نے ڈھاکا میں منشیات کی اسمگلنگ اور نشہ آور اشیاء کے استعمال کے خلاف تعاون کو فروغ دینے کے لیے ایک اہم معاہدے پر دستخط کیے ہیں۔
ملاقات کے دوران دونوں وزراء نے داخلی سلامتی اور قانون نافذ کرنے والے اداروں کے درمیان دوطرفہ تعاون کو وسیع کرنے پر اتفاق کیا۔ مفاہمت کی یادداشت کے تحت پاکستان اور بنگلہ دیش منشیات کی غیر قانونی ترسیل، اسمگلنگ اور فروخت کے خاتمے کے لیے مشترکہ کوششیں کریں گے۔
دونوں ممالک منشیات فروشوں اور جرائم پیشہ نیٹ ورکس کے بارے میں بروقت خفیہ معلومات کا تبادلہ کریں گے۔ اس کے علاوہ انسداد منشیات کے آپریشنز میں جدید ٹیکنالوجی، افرادی قوت کی تربیت اور بہترین طریقوں کا اشتراک بھی کیا جائے گا۔
وزارت داخلہ کی سطح پر مستقبل کے تعاون کو مربوط کرنے کے لیے سیکریٹری سطح کا ایک جوائنٹ ورکنگ گروپ قائم کرنے کا فیصلہ کیا گیا ہے۔ محسن نقوی نے بنگلہ دیش کے سیف سٹی پروجیکٹ کے لیے پاکستان کی مکمل حمایت اور ہر سطح پر تعاون کی یقین دہانی کرائی ہے۔
مذاکرات میں انسداد دہشت گردی، سائبر کرائم، منظم جرائم اور مالیاتی فراڈ کی تحقیقات کے شعبوں میں بھی تعاون بڑھانے پر غور کیا گیا۔ اس کے علاوہ سول آرمڈ فورسز اور پولیس اکیڈمی کے افسران کی تربیت کے حوالے سے بھی بات چیت کی گئی۔
وفاقی وزیر محسن نقوی نے بنگلہ دیشی ہم منصب کو دورہ پاکستان کی دعوت دی، جبکہ صلاح الدین احمد نے سیف سٹی پروجیکٹ میں تعاون کی پیشکش پر پاکستان کا شکریہ ادا کیا۔ اجلاس میں بنگلہ دیش کے خارجہ سیکریٹری اسد عالم سیام، کابینہ سیکریٹری نسیم الغنی، ہوم سیکریٹری منظور چوہدری اور بنگلہ دیش میں تعینات پاکستان کے ہائی کمشنر عمران حیدر بھی موجود تھے۔
