اسلام آباد میں خراب موسم کے باعث متعدد ملکی اور غیر ملکی پروازوں کا رخ سیالکوٹ انٹرنیشنل ایئرپورٹ کی جانب موڑ دیا گیا۔ اتوار کے روز پیش آنے والے اس واقعے کی تصدیق ترجمان سیالکوٹ ایئرپورٹ نے کی۔
ترجمان کے مطابق موسم کی صورتحال بہتر ہوتے ہی سیالکوٹ ایئرپورٹ پر اتاری گئی تمام پروازیں اپنی اصل منزلوں کی جانب روانہ کر دی گئیں۔ حکام کا کہنا ہے کہ سیالکوٹ ایئرپورٹ پر لینڈنگ کے دوران کسی بھی طیارے کو کسی قسم کی تکنیکی دشواری کا سامنا نہیں کرنا پڑا۔
جن پروازوں کا رخ تبدیل کیا گیا ان میں کوئٹہ سے اسلام آباد آنے والی فلائی جناح، ریاض سے اسلام آباد آنے والی پاکستان انٹرنیشنل ایئرلائنز، شارجہ سے اسلام آباد آنے والی ایئر بلیو اور کراچی سے اسلام آباد آنے والی ایئر سیال کی پروازیں شامل تھیں۔
