لاہور میں اتوار کی شب ایچی سن کالج کے مرکزی دروازے کے قریب پیش آنے والے ایک افسوسناک ٹریفک حادثے میں تین افراد زندگی کی بازی ہار گئے۔ تیز رفتار ٹریکٹر ٹرالی نے موٹر سائیکل کو ٹکر مار دی جس کے نتیجے میں دو افراد موقع پر ہی دم توڑ گئے۔
ریسکیو ذرائع کے مطابق حادثے میں شدید زخمی ہونے والا تیسرا شخص اسپتال منتقلی کے دوران زخموں کی تاب نہ لاتے ہوئے چل بسا۔ جاں بحق ہونے والوں کی شناخت 45 سالہ شاہد، 35 سالہ محسن ہارون اور 26 سالہ عدنان کے ناموں سے ہوئی ہے۔
حادثے کی اطلاع ملتے ہی ڈی ایس پی ٹریفک عقیل گجر نے جائے وقوعہ کا دورہ کیا اور ٹریکٹر ٹرالی کے ڈرائیور کو حراست میں لے لیا۔ ریس کورس تھانے کی پولیس نے موقع پر پہنچ کر قانونی کارروائی کا آغاز کر دیا ہے۔
سی ٹی او لاہور نے واقعے کا نوٹس لیتے ہوئے حادثے کی تفصیلی رپورٹ طلب کر لی ہے۔ پولیس کی جانب سے معاملے کے تمام پہلوؤں کا جائزہ لیا جا رہا ہے۔
