امریکی صدر ڈونلڈ ٹرمپ تین روزہ سرکاری دورے پر بیجنگ پہنچ گئے ہیں جہاں ان کا شاندار استقبال کیا گیا۔ صدر ٹرمپ اپنے قیام کے دوران چینی صدر شی جن پنگ سے ملاقات کریں گے جس میں جاری تجارتی جنگ اور عالمی معیشت کے معاملات پر تفصیلی تبادلہ خیال کیا جائے گا۔ صدر ٹرمپ اس سے قبل 2017 میں بھی چین کا دورہ کر چکے ہیں۔
واشنگٹن سے روانگی کے موقع پر میڈیا سے گفتگو کرتے ہوئے امریکی صدر نے کہا کہ جو کوئی بھی یہ کہتا ہے کہ ایران کو جوہری ہتھیار رکھنے کی اجازت ہونی چاہیے وہ احمق ہے۔ انہوں نے اس عزم کا اعادہ کیا کہ امریکہ ایران کے ساتھ ایک اچھا معاہدہ چاہتا ہے اور انہیں یقین ہے کہ ایسا سمجھوتہ دونوں ممالک کے مفاد میں ہوگا۔
صدر ٹرمپ نے خبردار کیا کہ ایران کے خلاف فتح بہرصورت امریکہ کی ہی ہوگی، چاہے یہ کامیابی پرامن طریقے سے حاصل ہو یا کسی اور ذریعے سے۔ انہوں نے مزید کہا کہ وہ بیجنگ میں چینی صدر کے ساتھ ایران کے تنازع اور علاقائی صورتحال پر تفصیلی بات چیت کریں گے، تاہم انہوں نے واضح کیا کہ امریکہ کو ایران کے معاملے پر چین کی مدد درکار نہیں ہے۔
اس موقع پر امریکی صدر نے پاکستان کے کردار کی کھل کر تعریف کی۔ انہوں نے کہا کہ مذاکراتی عمل میں پاکستان نے شاندار کردار ادا کیا ہے۔ صدر ٹرمپ نے وزیراعظم شہباز شریف اور فیلڈ مارشل عاصم منیر کو غیر معمولی شخصیات قرار دیتے ہوئے پاکستان کی ثالثی کوششوں کو بہترین الفاظ میں سراہا۔
