کینیڈا کے شہر ٹورنٹو میں منعقدہ ایک میوزک کنسرٹ کے دوران بھارتی گلوکار ٹلوینڈر اور پاکستانی گلوکار حسن رحیم کی مشترکہ پرفارمنس نے سوشل میڈیا پر ایک نئی بحث چھیڑ دی ہے۔ دونوں فنکاروں کو ایک ساتھ اسٹیج پر دیکھنے کے بعد سرحد کے دونوں جانب ملے جلے ردعمل کا اظہار کیا جا رہا ہے۔
ہندوستان ٹائمز کی رپورٹ کے مطابق ٹورنٹو میں ہونے والے اس کنسرٹ کے دوران ٹلوینڈر نے اچانک اسٹیج پر آ کر حسن رحیم کے ساتھ گانے پیش کیے، جس کے بعد دونوں فنکاروں کی ایک دوسرے کو گلے لگانے اور پرفارم کرنے کی ویڈیوز اور تصاویر انٹرنیٹ پر تیزی سے وائرل ہو گئیں۔
واقعے کے بعد ٹلوینڈر نے اپنے انسٹاگرام اکاؤنٹ پر کنسرٹ کی جھلکیاں شیئر کرتے ہوئے اسے ٹورنٹو میں ایک خواب کی تعبیر قرار دیا۔ اس بیان کے سامنے آتے ہی سوشل میڈیا صارفین کے دو گروہ بن گئے۔ جہاں کچھ ناقدین نے پاک بھارت کشیدہ تعلقات کے تناظر میں اس ملاقات کو غیر مناسب قرار دیتے ہوئے بھارتی گلوکار پر تنقید کی اور انہیں شدید جملوں کا نشانہ بنایا، وہیں دوسری جانب مداحوں کی ایک بڑی تعداد نے ان کا دفاع کیا۔
حمایت کرنے والے صارفین کا کہنا ہے کہ موسیقی اور فن کو سیاست اور سرحدوں کی قید سے آزاد ہونا چاہیے۔ ان کے نزدیک یہ ملاقات سیاسی وابستگی کے بجائے ثقافتی ہم آہنگی کی ایک علامت ہے۔
ٹلوینڈر اس سے قبل بھی اپنے پیشہ ورانہ اور ذاتی معاملات کی وجہ سے سرخیوں میں رہ چکے ہیں، جن میں اداکارہ دیشا پٹانی کے ساتھ ان کا نام جوڑے جانے کی افواہیں بھی شامل ہیں۔ ٹلوینڈر نے اپنے کیریئر کا آغاز ڈیجیٹل پلیٹ فارمز سے کیا تھا اور خاموشی، دھندلا اور فک لو جیسے گانوں سے شہرت حاصل کی۔ رواں برس ان کا پہلا البم مس فٹ ریلیز ہوا جس نے ان کی مقبولیت میں مزید اضافہ کیا۔
