فیڈریشن آف پاکستان چیمبرز آف کامرس اینڈ انڈسٹری کے صدر عاطف اکرام شیخ نے مختلف بین الاقوامی فورمز پر قومی کمیٹیاں تشکیل دینے کا اعلان کر دیا ہے۔ ان فورمز میں ایکو سی سی آئی، پاکستان یورپی یونین بزنس فورم، کیسی، پاکستان آسیان بزنس فورم، دولت مشترکہ، ڈی ایٹ سی سی آئی اور او آئی سی شامل ہیں۔ اس سلسلے میں ملک بھر کی تجارتی تنظیموں، چیمبرز اور ایسوسی ایشنز کے لیے رکنیت سازی مہم کا بھی آغاز کر دیا گیا ہے۔
عاطف اکرام شیخ کا کہنا ہے کہ یہ اہم اقدام علاقائی اور عالمی اقتصادی پلیٹ فارمز پر پاکستان کی مؤثر نمائندگی اور فعال شرکت کو یقینی بنائے گا۔ اس پیش رفت سے بین الاقوامی تنظیموں کے ساتھ روابط کو ادارہ جاتی شکل دے کر ملکی تجارت، سرمایہ کاری اور اقتصادی مفادات کو بہتر انداز میں فروغ دیا جا سکے گا۔
ایف پی سی سی آئی کے سربراہ نے مزید وضاحت کی کہ ان کمیٹیوں میں کاروباری برادری کے تجربہ کار نمائندگان اور متعلقہ اسٹیک ہولڈرز شامل ہوں گے جو بین الاقوامی منڈیوں پر گہری نظر رکھتے ہیں۔ یہ نمائندگان ابھرتے ہوئے عالمی رجحانات، پالیسی سازی اور پاکستان کے لیے نئے مواقع پر غور کریں گے، جبکہ بیرون ملک پاکستانی کمرشل مشنز اور غیر ملکی چیمبرز کے ساتھ رابطوں کو مستحکم کریں گے۔
صدر ایف پی سی سی آئی نے کہا کہ یہ اقدام پاکستانی تاجر برادری کو بدلتی ہوئی عالمی اقتصادی حرکیات سے ہم آہنگ کرنے کے عزم کا مظہر ہے۔ اس سے تجارتی سفارت کاری کو فروغ ملے گا، دو طرفہ اور کثیر الجہتی تعاون میں اضافہ ہوگا، برآمدات اور سرمایہ کاری کے نئے راستے کھلیں گے اور حکومت کو مؤثر پالیسی تجاویز فراہم کی جا سکیں گی۔
عاطف اکرام شیخ نے اس یقین کا اظہار کیا کہ یہ کمیٹیاں عالمی سطح پر پاکستان کے اقتصادی اثر و رسوخ کو بڑھانے، غیر ملکی ہم منصبوں کے ساتھ ادارہ جاتی روابط کو بہتر بنانے اور پائیدار اقتصادی ترقی میں کلیدی کردار ادا کریں گی۔ اس عمل کو شفاف اور جامع بنانے کے لیے ملک بھر کی تجارتی تنظیموں سے نامزدگیاں طلب کی گئی ہیں۔
