امریکی وزیر خارجہ مارکو روبیو نے کہا ہے کہ واشنگٹن کو تنازع کے خاتمے کے لیے پیش کردہ تجاویز پر ایران کی جانب سے جمعہ کے روز جواب کا انتظار ہے۔ روم کے دورے کے موقع پر میڈیا سے گفتگو کرتے ہوئے انہوں نے امید ظاہر کی کہ تہران کی جانب سے ملنے والا جواب سنجیدہ ہوگا تاکہ مذاکرات کا باقاعدہ عمل شروع کیا جا سکے۔
مارکو روبیو نے آبنائے ہرمز پر کنٹرول حاصل کرنے کی ایرانی کوششوں کو ناقابل قبول قرار دیتے ہوئے کہا کہ ایران ایک بین الاقوامی آبی گزرگاہ پر اپنے حق ملکیت کا دعویٰ کر رہا ہے جسے معمول بنانے کی کوشش کی جا رہی ہے جو کسی صورت قابل قبول نہیں۔
واضح رہے کہ اٹھائیس فروری کو امریکی و اسرائیلی حملوں کے بعد سے ایران نے بڑی حد تک آبنائے ہرمز کو بند کر رکھا ہے جبکہ بعد ازاں امریکہ نے بھی ایرانی بندرگاہوں کا محاصرہ کر لیا تھا۔ عالمی منڈیوں میں تیل کی قیمتوں میں حالیہ بہتری پاکستان کی ثالثی میں جاری امن عمل اور آٹھ اپریل سے نافذ جنگ بندی کے تسلسل کی امید پر دیکھی گئی تھی۔
تاہم جمعہ کے روز آبنائے ہرمز میں ایرانی اور امریکی افواج کے درمیان فائرنگ کے تبادلے کے بعد عالمی اسٹاک مارکیٹوں میں دوبارہ مندی دیکھی گئی ہے جس سے خدشات پیدا ہو گئے ہیں کہ دوبارہ شروع ہونے والی لڑائی آبی گزرگاہ کو کھولنے کے عمل کو متاثر کر سکتی ہے۔
امریکی وزیر خارجہ نے دعویٰ کیا کہ امریکی بحری جہازوں پر ایرانی فائرنگ کے جواب میں کارروائی کرنا مجبوری تھی۔ انہوں نے کہا کہ ہم نے پہلے فائر نہیں کیا بلکہ ایرانی جانب سے حملہ کیا گیا۔ دوسری جانب ایران کی مرکزی عسکری کمانڈ کا کہنا ہے کہ جھڑپ اس وقت شروع ہوئی جب امریکی جہازوں نے آبنائے ہرمز کی جانب جانے والے ایک ایرانی شہری آئل ٹینکر کو نشانہ بنایا۔ ایرانی حکام نے اپنے حریف پر شہری آبادیوں کو نشانہ بنانے کا الزام بھی عائد کیا ہے۔
