کراچی میں عید الفطر کی آمد کے موقع پر ہوائی فائرنگ کا سلسلہ جاری رہا جس کے نتیجے میں تین بچوں سمیت سات افراد گولیاں لگنے سے زخمی ہو گئے۔ پولیس میڈیا سیل کے مطابق زخمیوں میں تین مرد اور ایک خاتون بھی شامل ہیں۔
پولیس حکام نے بتایا کہ داؤد چورنگی کے قریب آٹھ سالہ بچہ گولی لگنے سے زخمی ہوا جسے جناح پوسٹ گریجویٹ میڈیکل سینٹر منتقل کیا گیا۔ اسی طرح جانجال گوٹھ میں نو سالہ بچی اور لیاری کی شاہ بیگ لین میں تیرہ سالہ لڑکا ہوائی فائرنگ کی زد میں آ کر زخمی ہوئے جنہیں عباسی شہید اور سول ہسپتال منتقل کیا گیا۔
شہر کے دیگر علاقوں میں بھی ہوائی فائرنگ کے واقعات پیش آئے جن میں شاہ لطیف داؤد چالی کے قریب اٹھارہ سالہ نوجوان، اسلامیہ کالونی میں انتیس سالہ شخص، نیو میانوالی کالونی میں بتیس سالہ شخص اور بدھ بازار کے قریب بتیس سالہ خاتون زخمی ہوئیں۔ ان تمام زخمیوں کو طبی امداد کے لیے عباسی شہید ہسپتال پہنچایا گیا۔
کراچی پولیس نے واقعے کی تحقیقات شروع کر دی ہیں۔ واضح رہے کہ شہر میں تہواروں اور خوشی کے مواقع پر ہوائی فائرنگ کا رجحان خطرناک حد تک بڑھ چکا ہے۔ رواں برس کے آغاز پر نئے سال کی تقریبات کے دوران بھی شہر بھر میں اٹھائیس افراد زخمی ہوئے تھے جبکہ جنوری میں کیٹل کالونی میں شادی کی تقریب کے دوران فائرنگ سے چھ افراد زخمی ہو چکے ہیں۔
