نائب وزیراعظم اور وزیر خارجہ سینیٹر اسحاق ڈار نے اقوام متحدہ کے سیکریٹری جنرل انتونیو گوتریس سے ٹیلی فونک رابطہ کیا ہے۔ اس گفتگو کے دوران مغربی ایشیا کی بدلتی ہوئی صورتحال اور عالمی امن و سلامتی پر اس کے اثرات پر تبادلہ خیال کیا گیا۔
سماجی رابطے کی ویب سائٹ ایکس پر اپنے پیغام میں اسحاق ڈار نے کہا کہ انہوں نے اس بات پر زور دیا ہے کہ تنازعات کی روک تھام اور ان کے حل کے لیے اقوام متحدہ کا کردار ناگزیر ہے۔ انہوں نے اعادہ کیا کہ پاکستان پائیدار امن کے حصول کے لیے سفارت کاری اور بات چیت کو ہی واحد قابل عمل راستہ سمجھتا ہے۔
اسحاق ڈار کے مطابق اقوام متحدہ کے سیکریٹری جنرل نے خطے میں امن و استحکام کے لیے پاکستان کی جاری سفارتی کوششوں کو سراہا اور ان کی مکمل حمایت کا یقین دلایا ہے۔
