لاہور ہائی کورٹ میں پیٹرولیم مصنوعات کی قیمتوں میں اضافے کے خلاف متفرق درخواست دائر کر دی گئی۔ جوڈیشل ایکٹیوزم پینل کی جانب سے دائر کی گئی اس درخواست میں وفاقی حکومت، اوگرا اور دیگر متعلقہ اداروں کو فریق بنایا گیا ہے۔
درخواست گزار کا موقف ہے کہ وفاقی حکومت کی جانب سے دو اپریل کو پیٹرولیم مصنوعات کی قیمتوں میں غیر معمولی اضافہ کیا گیا تھا۔ اگرچہ حکومت نے تین اپریل کو پیٹرول کی قیمت میں اسی روپے کی کمی کا اعلان کیا، تاہم یہ ریلیف عالمی منڈی کے رجحانات سے مطابقت نہیں رکھتا۔
درخواست میں عدالت سے استدعا کی گئی ہے کہ وفاقی حکومت کو پیٹرولیم مصنوعات کی قیمتوں میں مزید کمی کرنے کا حکم دیا جائے۔ اس کے علاوہ عدالت سے یہ بھی گزارش کی گئی ہے کہ ایندھن کی قیمتوں کے تعین کے لیے ایک ایسا شفاف اور منصفانہ طریقہ کار وضع کیا جائے جس سے عوام کو ریلیف مل سکے۔
