پی آئی اے ہولڈنگ کمپنی لمیٹڈ کے شیئر ہولڈرز نے پاکستان انٹرنیشنل ایئرلائنز کارپوریشن لمیٹڈ میں 75 فیصد حصص کی نجکاری کی منظوری دے دی ہے۔ پیر کے روز پاکستان اسٹاک ایکسچینج کو ارسال کردہ مراسلے میں بتایا گیا ہے کہ یہ عمل حصص کی منتقلی اور ڈائلیوشن کے ذریعے مکمل کیا جائے گا۔
گزشتہ برس عارف حبیب کارپوریشن کی زیر قیادت کنسورشیم نے ٹیلی ویژن پر براہ راست نشر ہونے والی نیلامی کے دوران 75 فیصد حصص کے لیے 135 ارب روپے کی بلند ترین بولی دی تھی۔ یہ رقم حکومت کی جانب سے مقرر کردہ 100 ارب روپے کی ریزرو قیمت سے کہیں زیادہ ہے۔
شیئر ہولڈرز کی جانب سے منظور کردہ قرارداد کے مطابق نجکاری کا عمل پی آئی اے ایکویٹی لمیٹڈ کی جانب سے حصص کی سبسکرپشن اور ٹرانزیکشن دستاویزات کے عین مطابق مکمل ہوگا۔
کمپنی کے شیئر ہولڈرز نے بقیہ 25 فیصد حصص کی ممکنہ فروخت کی بھی منظوری دے دی ہے۔ اگر پی آئی اے ایکویٹی لمیٹڈ شیئر پرچیز اینڈ سبسکرپشن معاہدے کے تحت کال آپشن کا استعمال کرتی ہے تو پی آئی اے ہولڈنگ کمپنی بقیہ حصص بھی منتقل کرنے کی پابند ہوگی۔
حکومت پاکستان کی زیر ملکیت پی آئی اے ہولڈنگ کمپنی کو قومی ایئرلائن کے اثاثوں، واجبات اور ذیلی اداروں کے انتظام کے لیے قائم کیا گیا تھا۔ کمپیٹیشن کمیشن آف پاکستان کا کہنا ہے کہ اس نجکاری سے ملکی ہوا بازی کے شعبے میں نئے دور کا آغاز ہوگا اور مسابقتی ماحول کو فروغ ملے گا۔
