وزیر اعلیٰ خیبر پختونخوا محمد سہیل آفریدی کی زیر صدارت پختونخوا ہائی ویز کونسل کا 24 واں اجلاس منعقد ہوا جس میں اتھارٹی کے بجٹ، سالانہ مینٹیننس پلان اور اہم انتظامی امور کی منظوری دی گئی۔
اجلاس کے دوران خیبر پختونخوا ہائی ویز اتھارٹی کی سالانہ آپریشنل گرانٹ کو 3 کروڑ سے بڑھا کر 4 کروڑ روپے کرنے کا فیصلہ کیا گیا۔ وزیر اعلیٰ نے ہدایت کی کہ آئندہ بجٹ میں ہائی ویز اتھارٹی کے لیے مزید فنڈز اور بڑے ترقیاتی منصوبوں کو شامل کیا جائے۔
نوجوانوں کو روزگار کے مواقع فراہم کرنے کے لیے خیبر پختونخوا انٹرن شپ پروگرام میں نشستوں کی تعداد 5 ہزار سے بڑھا کر 6 ہزار کر دی گئی ہے، جس میں 20 فیصد اضافہ کیا گیا ہے۔
صوبے میں کاروبار میں آسانی کو فروغ دینے کے لیے وزیر اعلیٰ نے اتھارٹی کو رائٹ آف وے چارجز وصول نہ کرنے کی سخت ہدایت کی ہے۔ اس کے علاوہ سروس ریگولیشنز 2019 میں ترامیم کے ساتھ ساتھ ملازمین کے ریٹائرمنٹ بینیفٹس اور دوران ملازمت وفات پانے والوں کے لیے معاوضے کی منظوری بھی دی گئی۔
اجلاس میں لوئر دیر میں گل آباد سے سربالا روڈ کو صوبائی تحویل میں لینے کے لیے باقاعدہ فزیبلٹی اسٹڈی شروع کرنے کا حکم دیا گیا ہے۔ مزید برآں صحت کارڈ اسکیم کے تحت ملازمین کی وفات کی صورت میں ورثاء کے لیے مالی امداد کے پیکیج کو بہتر بنانے کا اصولی فیصلہ بھی کیا گیا۔
وزیر اعلیٰ محمد سہیل آفریدی نے کہا کہ صوبائی حکومت پارٹی بانی کے ویژن کے مطابق عوامی فلاح و بہبود اور خوشحالی کے لیے پرعزم ہے اور وسائل کا موثر استعمال یقینی بنایا جائے گا۔
