پنجاب حکومت نے ماحولیاتی آلودگی کے خاتمے اور پلاسٹک کے مضر اثرات سے بچاؤ کے لیے صوبے بھر میں پلاسٹک بیگز کے خلاف سخت کارروائی کا فیصلہ کیا ہے۔ اس اقدام کا بنیادی مقصد صوبے کو پلاسٹک فری زون بنانا ہے۔
رکن صوبائی اسمبلی کنول لیاقت کا کہنا ہے کہ پلاسٹک کے تھیلوں کا استعمال انسانی صحت کے لیے شدید خطرات کا باعث بن رہا ہے۔ انہوں نے خبردار کیا کہ پلاسٹک بیگز نہ صرف فضائی آلودگی میں اضافے کا سبب ہیں بلکہ ان کے استعمال سے کینسر جیسی مہلک بیماریوں کے خدشات بھی بڑھ رہے ہیں۔
کنول لیاقت نے مزید کہا کہ پلاسٹک کے متبادل کے طور پر کاغذ کے تھیلے ایک بہترین اور سستا ذریعہ ہیں۔ انہوں نے زور دیا کہ عوام کو ان متبادل ذرائع کی طرف لانا وقت کی اہم ضرورت ہے تاکہ ماحول کو صاف ستھرا اور محفوظ بنایا جا سکے۔
